New Delhi News: ‘नीले गगन के तले धरती का प्यार पले’ या गाण्यातील वर्णन केलेल्या धरतीचे म्हणजेच पृथ्वीचे मनोहारी दर्शन निळ्याशार आकाशातून भारताचे दुसरे अंतराळवीर शुभांशू शुक्ला यांनी घेतले. ‘ॲक्झिओम स्पेस’ या खासगी अवकाश संस्थेच्या ‘ॲक्झिओम-४’ या व्यावसायिक मोहिमेद्वारा शुक्ला यांनी आंतरराष्ट्रीय अंतराळ स्थानकाकडे (आयएसएस) बुधवारी (ता. २५) दुपारी १२ वाजून एक मिनिटांनी आकाशात झेप घेऊन इतिहास घडविला.

भारताचे पहिले अंतराळवीर राकेश शर्मा हे तत्कालीन सोव्हिएत महासंघाच्या मोहिमेद्वारे १९८४ मध्ये अंतराळात गेले होते. तेथे ते आठ दिवस होते. त्यानंतर ४१ वर्षांनी शुक्ला हे अंतराळात जाणारे दुसरे भारतीय तर आंतरराष्ट्रीय अंतराळ स्थानकावर जाणारे पहिले भारतीय अंतराळवीर आहेत.

‘‘आपण पुन्हा ४१ वर्षांनी अंतराळात भरारी घेतली आहे. आम्ही ७.५ किलोमीटर प्रतिसेकंद वेगाने पृथ्वीची परिक्रमा करीत आहोत. ही एक अभूतपूर्व सफर आहे. माझ्या खांद्यावरील तिरंगा मला सांगत आहे, की मी तुमच्याबरोबर आहे. माझा हा प्रवास अंतराळ स्थानकाची (आयएसएस) सुरुवात नाही तर भारताच्या मानवी अंतराळ कार्यक्रमाचा प्रारंभ आहे.

तुम्हीही या मोहिमेचा हिस्सा बनावा, अशी माझी अपेक्षा आहे. तुमचा उर अभिमानाने फुलून यायला हवा. आपण सर्वजण एकत्र येऊन भारताच्या मानवी अंतराळ मोहिमेचा प्रारंभ करू या. जयहिंद! जय भारत,’’ असा संदेश शुक्ला यांनी उड्डाणानंतर अवकाशातून पाठविला.

उड्डाणापूर्वी शुक्ला म्हणाले की ‘‘या मोहिमेमुळे माझ्या देशातील पिढीची उत्सुकता जागृत होऊन नवोन्मेषाला चालना मिळण्याची आशा आहे. मी एकटा अंतराळ मोहिमेवर आलो तरी हा १.४ अब्ज भारतीयांचा प्रवास आहे,’’ असा मला विश्वास आहे. शुक्ला यांच्यासह चार अंतराळवीरांची ही मोहीम विविध कारणांनी सहा वेळा पुढे ढकलण्यात आली होती.