Solapur News: माऊली-माऊलीच्या जयघोषत...सकाळी हजारो वारकऱ्यांच्या उपस्थितीत संत ज्ञानेश्वर महाराजांच्या पालखी सोहळ्यातील दुसरे गोल रिंगण खुडूस फाटा येथे अपार उत्साहात पार पडले.

नातेपुते येथील मुक्कामानंतर संत ज्ञानेश्वर महाराजांचा पालखी सोहळा सकाळच्या थंड हवामानात खुडूस फाटा येथे आल्यानंतर सव्वाआठच्या सुमारास हे रिंगण पार पडले. या ठिकाणी हा सोहळा डोळ्यात साठवण्यासाठी मोठ्या संख्येने भाविक दाखल झाले होते. त्या आधी जरीपटक्याचा निशाना असलेल्या अश्वांनी रिंगणस्थळी प्रवेश केला.

सुरुवातीला पालखी रिंगण सोहळ्याभोवती फिरवून आणून मध्यभागी असलेल्या चबुतऱ्यावर विराजमान करण्यात आली. त्या पाठोपाठ डोईवर तुळशी वृंदावन घेतलेल्या महिला वारकरी, विणेकरी आणि दिंड्या आल्या.

रिंगणात वैष्णवांचा सोहळा पोहोचताच, लाखोंच्या जनसमुदायाने टाळ्याच्या गजरात स्वागत केले. त्यानंतर चोपदारांनी रिंगण लावून घेतले. मानाच्या दिंड्यांना आत सोडले. त्यानंतर माऊलींच्या अश्वाने दौडण्यास सुरुवात करताच भाविकांनी ‘माऊली, माऊली, माऊली’चा गजर केला आणि दोनच मिनिटांत तीन फेऱ्या पूर्ण करून उपस्थितांच्या डोळ्यांचे पारणे फेडले.

रिंगण पूर्ण होताच अश्वाच्या टाचेखालील माती कपाळावर लावण्यासाठी एकच झुंबड उडाली. त्यानंतर रिंगणाचे अश्व विसावताच वारकरी मैदानात उतरले. दिंड्या-दिंड्यांमध्ये खेळ रंगले. हुतुतू, गड्यास गडी, हमामा, सुरपाट, कबड्डी, खो-खो, फुगडी अशा खेळांनी वारकऱ्यांमध्ये नवचैतन्य निर्माण झाले. निमगावपाटी येथे दुपारी विसावा घेऊन पालखी सोहळा वेळापूरनगरीमध्ये विसावला.\