Pune News : कोकण हापूसचा हंगाम संपत आला असून, आता पुणे जिल्ह्यातील पश्‍चिम घाट परिसरातील गावरान आंब्यांच्या हंगामाला प्रारंभ झाला आहे. पारंपरिक हापूससह केसर आणि स्थानिक रायवळ, पायरीसह विविध वाणांची आवक होत आहे. ही आवक प्रामुख्याने मावळ, मुळशी, भोर, वेल्हा, तर केसरची आवक बारामती, इंदापूर, दौंड, पारनेर या तालुक्यांमधून होत आहे.

पूर्वमोसमी पावसाला सुरुवात झाल्यावर गावरान आंब्यांच्या हंगामाला प्रांरभ होत असल्याचे गावरान आंब्याचे प्रमुख आडतदार तात्या कोंडे यांनी सांगितले. रविवारी (ता.२६) खडकवासला, मुळशी भागातून साधारण ५० क्रेट आवक झाली होती. ही आवक पुढील आठवड्यात वाढून हंगाम जोमात जून अखेरपर्यंत सुरू राहील, असे कोंडे यांनी सांगितले.

कोकण हापूसचा हंगाम संपत आल्याने गावरान आंब्यांना मागणी वाढली आहे. आवक वाढत असल्याने गावरानची खरेदी सुरू झाली आहे. घरगुती ग्राहकांसह किरकोळ विक्रेत्यांकडून मागणी आहे, असेही ते म्हणाले.

प्रति डझनचे दर

हापूस २०० ते ३००

पायरी १५० ते २००

रायवळ ३० ते ५०

केसर प्रतिकिलो ३० ते ८० रुपये