Wangaon News : कृषी विज्ञान केंद्राने शेतकऱ्यांना आधुनिक शेतीची माहिती द्यावी. कमीत कमी वेळेत अधिक लोकांपर्यंत तंत्रज्ञान पोहोचले पाहिजे. तरच शेतकरी त्याचा वापर करून उत्पन्न मिळवू शकेल.

नव्या पिढीला स्मार्ट तंत्रज्ञानाची गरज आहे, असे प्रतिपादन डॉ. बाळासाहेब सावंत कोकण कृषि विद्यापीठाचे कुलगुरू डॉ. संजय भावे यांनी केले.

कोकणातील चारही कृषी विज्ञान केंद्राचा आढावा आणि उपक्रमाबाबत चर्चा करण्यासाठी शास्त्रीय सल्लागार समितीची सभा नुकतीच डॉ. बाळासाहेब सावंत कोकण कृषी विद्यापीठ, दापोली येथे झाली. त्या वेळी कुलगुरू भावे बोलत होते.

बदलत्या हवामानानुसार शेतीपूरक व्यवसायावर भर द्यावे. केंद्र सरकारच्या १०० दिवस नियोजनानुसार केंद्राने कौशल्य आधारित प्रशिक्षण घ्यावे, असे अटारी पुणे येथील संचालक डॉ. एस. के. रॉय यांनी सूचवले. तर मुख्य वैज्ञानिक डॉ. शाकीर अली यांनी कृत्रिम बुद्धिमत्ता तंत्रज्ञान आत्मसात करण्याचे सूचवले.

शेतकऱ्यांची उपस्थिती

चिकू फळगळ व्यवस्थापनाबाबत विद्यापीठाने संशोधन करण्याची गरज असल्याचे पालघर जिल्ह्यातील कृषिभूषण यज्ञेश सावे यांनी सांगितले. वाडा येथील प्रगतिशील शेतकरी राजेश रिकामे यांनी शेतीमध्ये तरुणाचा सहभाग वाढवण्यासाठी कृषी विज्ञान केंद्राने विविध उपक्रम आयोजित करावेत, असे सांगितले. तसेच कमी उंची आणि न लोळणे हे गुणधर्म प्रसिद्ध वाडा कोलम भातामध्ये कसे येतील, यासाठी विद्यापीठाने संशोधन करावे, असे सूचवले.