Dhangar Community Reservation : धनगर समाजाचं आरक्षणासाठी अहमदनगर जिल्ह्यात चौडी येथे यशवंत सेनेच्या अण्णासाहेब रुपनर आणि सुरेश बंडगर यांनी उपोषण सुरू केले. त्यांच्या उपोषणाचा आज १७ दिवस असून त्यांना राज्यभरातून प्रतिसाद मिळत आहे. या प्रश्नावर काल मुंबईत सरकारच्यावतीने बैठक घेण्यात आली. परंतु, तोडगा न निघाल्याने आंदोलक शासन निर्णयाच्या मागणी मान्य होत नाही. तोपर्यंत आंदोलन सुरूच ठेवणार असल्याचे जाहीर केले. त्यांनी कालपासून जलत्याग केल्याने त्यांची प्रकृती खालावली आहे. त्यामुळे राज्य सरकारची चांगलीच कोंडी झाली आहे.

धनगर आरक्षणासंदर्भात काल मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या उपस्थितीत सह्याद्री अतिथीगृह, मुंबई येथे सकारात्मक बैठक झाली. यावेळी मंत्री राधाकृष्ण विखे पाटील, गिरीश महाजन, अतुल सावे, तसेच आ. गोपीचंद पडळकर, राम शिंदे, दत्तात्रय भरणे व इतर धनगर समाजातील नेते उपस्थित होते. या बैठकीत सरकारच्यावतीने आरक्षणासंदर्भात निर्णय चार राज्यांमधील आरक्षण पध्दतीचा आरक्षणाचा अभ्यास करण्यासाठी दोन महिन्यांचा वेळ मागितला आहे. त्यामुळे आंदोलकांची नाराजी कायम असून ते आंदोलनावर ठाम आहेत.

चौंडी येथे सुरेश बंडगर यांचे आजही उपोषण सुरू आहे. कालपासून सलाईन लावणं बंद केलं आहे. पाण्याचाही त्याग केला असून त्यांची प्रकृती खालावली आहे. त्यांनी मी कोणताही उपचार घेणार नाही. आरक्षण मिळत नाही तोपर्यंत लढा सुरूच राहील, असे सुरेश बंडगर यांनी जाहीर केले आहे.