Nagar News : कृषी विभागामार्फत शेतकऱ्यांना शेततळे, फळबाग योजनेसह विविध योजनांचा लाभ दिला जातो. हा लाभ देताना मंडल कृषी अधिकाऱ्यांकडून शेतकऱ्यांची अडवणूक केली जात असल्याचा आरोप शेतकऱ्यांनी केला आहे.

याबाबत संबंधिताची चौकशी करून कारवाई करावी, अशी मागणी देशमुखवाडी (ता. कर्जत) येथील शेतकऱ्यांनी मुख्यमंत्री, कृषिमंत्री, कृषी आयुक्तांकडे निवेदनाद्वारे केली आहे. देशमुखवाडी (ता. कर्जत) येथील जवळपास ४५ शेतकऱ्यांनी मुख्यमंत्री एकनाथ शिंदे, कृषिमंत्री धनंजय मुंडे, कृषी आयुक्त व कृषी विभागाच्या अन्य अधिकाऱ्यांना निवेदन पाठवून आपली व्यथा मांडली आहे.

पुरावे देऊनही कारवाई होईना

कृषी विभाग शेतकऱ्यांच्या उन्नतीसाठी वेगवेगळ्या योजना राबवते. मात्र या योजनेचा शेतकऱ्यांना लाभ देताना मंडल कृषी अधिकारी शेतकऱ्यांची अडवणूक करत पैशाची मागणी करतात. पैसे न दिल्यास शेतकऱ्यांना वेठीस धरत आहेत.

पैसे दिल्याशिवाय कुठल्याही प्रकारचे बिल काढले जात नाही. यासंदर्भात आम्ही ऑडिओ, व्हिडिओसह अन्य पुरावे दिले. कृषी विभागाकडे सातत्याने मागणी तक्रार करूनही त्याकडे दुर्लक्ष केले जात असल्याचा देशमुख वाडीच्या शेतकऱ्यांचा आरोप आहे.