Mumbai News : राज्यात सुरू असलेले विविध पायाभूत सुविधांचे प्रकल्प, मेट्रो, सिंचन प्रकल्पांना तातडीने गती देऊन कालबद्धरित्या हे प्रकल्प वेळेत पूर्ण करण्याचे निर्देश देतानाच मुंबईतील वाहतूक कोंडीवरील उपाययोजनेसाठी प्रगत तंत्रज्ञानाच्या आधारे ‘ट्विन टनेल’ या नवीन संकल्पनेचा वापर करण्यासाठी मुंबई महापालिकेने सर्व्हे करण्याचे निर्देश मुख्यमंत्री एकनाथ शिंदे यांनी मंगळवारी (ता. २९) दिले.

मंत्रालयातील वॉर रूममध्ये राज्यातील १० महत्त्वांच्या प्रकल्पांचा आढावा घेण्यात आला. या वेळी उपमुख्यमंत्री देवेंद्र फडणवीस, उपमुख्यमंत्री अजित पवार, मुख्य सचिव मनोज सौनिक यांच्यासह विविध विभागांचे अपर मुख्य सचिव, प्रधान सचिव, सचिव उपस्थित होते. या बैठकीमध्ये प्रामुख्याने पुणे मेट्रो, नागपूर मेट्रो, मुंबई मेट्रो, सिंचन प्रकल्प, समृद्धी महामार्गलगत  ‘इकॉनॉमिक झोन’ या प्रकल्पांबाबत सविस्तर आढावा घेण्यात आला.

मुख्यमंत्री शिंदे म्हणाले, ‘‘पायाभूत सुविधांच्या प्रकल्पांची कामे राज्यात मोठ्या प्रमाणावर सुरू आहेत. ही कामे वेळेत सुरू झाल्यास त्याचा राज्यातील नागरिकांबरोबरच औद्योगिक विस्ताराला तसेच ग्रामीण भागाच्या विकासाला मोठी मदत मिळणार आहे.

बैठकीतील विषय...

   मुंबई मेट्रो मार्गिका ४, चार ए, आणि ११ साठी मोगरपाडा येथे डेपो करण्याकरिता जमीनसंपदाच्या विषयाबाबत आढावा.

   मिठी नदी विकास व प्रदूषण नियंत्रण प्रकल्प तातडीने पूर्ण करण्याच्या मुंबई महापालिका आयुक्तांना सूचना

   ठाणे-भिवंडी-कल्याण या मुंबई मेट्रो पाचच्या मार्गिकेसाठी कशेळी येथील भूसंपादनाबाबतचा आढावा

   दक्षिण मुंबई परिसरातील महत्त्वाचे रस्ते, पदपथावर होणारे अतिक्रमण काढून रस्ते, चौक स्वच्छ आणि सुंदर ठेवण्याबाबत निर्देश

   समृद्धी महामार्गालगत ‘इकॉनॉमिक झोन’ करण्याविषयी सविस्तर चर्चा

   निम्न पैनगंगा प्रकल्प मार्गी लावण्याबाबत जलसंपदा विभागाला दिल्या सूचना.