Kolhapur News : यंदाची पहिली उचल एकरकमी विनाकपात ३५०० रुपये प्रतिटन मिळावी, यासह मागील हंगामातील ४०० रुपये मिळावेत. ही मागणी मान्य होत नाही, तोपर्यंत ऊस तोडी बंद राहतील. हा निर्णय होईपर्यंत जयसिंगपूर येथे ठिय्या आंदोलन सुरू केले आहे,’’ अशी घोषणा स्वाभिमानी शेतकरी संघटनेचे संस्थापक राजू शेट्टी यांनी मंगळवारी (ता. ७) केली. ‘‘दिवाळीतील मुख्य चार दिवसांत खर्डा-भाकरी प्रत्येक कारखाना अध्यक्षाच्या घरी द्या,’’ असे आवाहन ही त्यांनी केले.
 

स्वाभिमानी शेतकरी संघटनेच्या वतीने मंगळवारी (ता. ७) जयसिंगपूर (जि. कोल्हापूर) येथे आयोजित ऊस परिषदेत ते बोलत होते. संघटनेचे ज्येष्ठ नेते राजाराम वाकरेकर अध्यक्षस्थानी होते.

श्री. शेट्टी म्हणाले, ‘‘हे आंदोलन चुकीचे आहे, असे कारखानदार म्हणतात. पुढच्या हंगामात वाढवून देतो, मागचे मागू नका, असे कारखानदार म्हणत आहेत. प्रत्येक वर्षी सगळ्यांचा ऊस नसतो, त्या शेतकऱ्याने काय करावे? आमच्या हक्काचे पैसे मागतो. साखर चढ्या दराने विकली त्याचे पैसे आम्हाला द्या. अनेक कारखान्यांनी साखर विक्रीतही गैरव्यवहार केला आहे. त्यांची का तपासणी होत नाही. रिकव्हरी कशी चोरली जाते हे आम्ही दाखवतो. आम्हाला कारखान्यांवर चार माणसे नेमायची संधी द्या. हे लोक एवढी चोरी व काटामारी कशी केली याची माहिती देतील. आता शेतकऱ्यांना एक होऊन दर मागावा लागेल. त्यासाठी सर्वांनी गटतट विसरून लढावे लागेल. पहिल्यांदा मागचे द्या, तर पुढचे बघू, असे आम्हाला आता ठणकावून सांगावे लागेल.’’

परिषदेतील काही प्रमुख ठराव...
 

• दोन टप्प्यांत एफआरपी देण्याच्या कायद्यात केलेल्या बेकायदेशीर दुरुस्तीबाबत शासन निर्णय तातडीने करावा.
   

• शेतीपंपांचे भारनियमन रद्द करून विनाकपात दिवसा १२ तास वीज द्या.
   

• ज्या सर्कलमध्ये खरिपाचे पीक वाया गेले, तो संपूर्ण भाग दुष्काळग्रस्त म्हणून जाहीर करावा.
   

• सर्व कारखान्यांचे काटे तातडीने ऑनलाइन करून एकाच प्रणालीमधील सॉफ्टवेअरमध्ये काटे बसवावेत.
   

• वाहतूकदारांची फसवणूक करणाऱ्या ऊस तोडणी मुकादमांवर गुन्हे दाखल करून वाहतूकदारांचे पैसे वसूल करा
   

• केंद्र व राज्य सरकारने तातडीने मराठा समाजाला आरक्षण द्यावे. धनगर, लिंगायत समाजाला त्यांच्या मागणीनुसार आरक्षण द्यावे.