Akola News : शेतकऱ्यांना केंद्रस्थानी ठेवत नवतंत्रज्ञानाची माहिती शेतकऱ्यांपर्यंत पोहोचविण्याचे काम नेहमीच आकाशवाणीने केले आहे.

शेतकऱ्यांची आकाशवाणीप्रती असणारी बांधिलकी जपत अकोला आकाशवाणी केंद्राच्या वतीने प्रयोगशील शेतकरी परमानंद मोटवानी यांच्या सराळा येथील शेतामध्ये रेडिओ किसान दिन (Kisan Din)घेण्यात आला. या वेळी शेतकरी मार्गदर्शन व सन्मान सोहळा झाला.

तंत्रज्ञानाच्या माध्यमातून पिकाचे उत्पादन वाढवणे, खर्च कमी करणे व शेतीमधे रासायनिक खतांचा वापर कमी करून जैविक शेतीचा प्रयोग करणे ही त्रिसूत्री शेतीला समृद्ध करणारी आहे, असे प्रतिपादन सोहळ्याचे उद्‍घाटक असलेले डॉ. पंजाबराव देशमुख कृषी विद्यापीठाचे शिक्षण विस्तार संचालक डॉ. धनराज उंदीरवाडे यानी केले.

कोरोना काळात संपूर्ण देश बंद असताना केवळ कृषी क्षेत्र अखंडपणे सुरू होते, अशी भावना कृषी शास्त्रज्ञांनी व्यक्त केली.

ग्रामपंचायत सरपंच वसंतराव जाधव यांच्या अध्यक्षतेखाली झालेल्या सोहळ्याला स्नातकोत्तर पशुवैद्यकीय व पशू विज्ञान संस्थेचे सहयोगी अधिष्ठाता डॉ. धनंजय दिघे, कृषी विज्ञान केंद्राचे वरिष्ठ शास्त्रज्ञ डॉ. उमेश ठाकरे, पशुसंवर्धन सहायक आयुक्त डॉ. नम्रता वाघमारे, तंत्र अधिकारी ज्योती चोरे यांनी मार्गदर्शन केले.

या वेळी आकाशवाणी कार्यालय प्रमुख हेमंत सीडाम, कार्यक्रम प्रमुख विजय दळवी, कार्यक्रम अधिकारी देविदास पारखी, कृषी कार्यक्रम प्रसारण अधिकारी सूरज गोळे यांच्यासह शेतकऱ्यांची उपस्थिती होती.

नवतंत्रज्ञान, जैविक शेती, फळबाग लागवडीसह कृषी क्षेत्रामध्ये नावीन्यपूर्ण प्रयोग करणाऱ्या शेतकऱ्यांचा सन्मान करण्यात आला. कार्यक्रमाचे सूत्रसंचालन विकास पल्हाडे यांनी केले.