Chandrapur News : दर पाच वर्षांनी होणाऱ्या पशुगणनेसाठी तयार करण्यात आलेले अॅप कामच करीत नसल्याने मोहीम सुरू होण्याआधीच थांबविण्यात आली आहे. एक सप्टेंबरपासून पशुगणनेचे काम सुरू होणार होते. मात्र आज वीस दिवसांचा काळ लोटला तरी पशुगणनेला सुरुवात झाली नाही.

पशुसंवर्धन विभागाच्या माध्यमातून दर पाच वर्षांनी पशुगणना होते. एक सप्टेंबरपासून राज्यभरात पशुगणनेचे काम सुरू होणार होते. २०१९ रोजी करण्यात आलेली पशुगणना टॅबच्या मदतीने करण्यात आली होती. आता त्यापुढे एक पाऊल विभागाने टाकले आहे. २१व्या पशुगणनेसाठी मोबाइल अॅप्लिकेशन आणि वेबपोर्टल तयार करण्यात आले आहे.

या डिजिटल पद्धतीचा वापर करून पशुगणना करण्यात येणार आहे. पशुगणनेसाठी तयार करण्यात आलेल्या अॅपद्वारे ऑगस्ट महिन्यात प्रयोगिक तत्त्वावर काही ठिकाणी पशुगणना करण्यात आली होती.

त्यादरम्यान नोंदणीत काही चुका होत असल्याची बाब समोर आली. याचदरम्यान पशुगणनेसाठी तयार करण्यात आलेले अॅप कामच करीत नसल्याचे समोर आले. विकसित करण्यात आलेले अॅप रिफ्रेश होत नसल्याने एक सप्टेंबरपासून सुरू होणाऱ्या पशुगणनेचे काम लांबणीवर पडल्याचे चित्र आहे.

जिल्ह्यात ७.५२ लाख जनावरे

२०१९ रोजी जिल्ह्यात पशुगणना करण्यात आली. या गणनेनुसार जिल्ह्यात ७ लाख ५२ हजार २८६ जनावरे आहेत. त्यात गायवर्गीय जनावरे ३ लाख ९५ हजार ९१६, म्हशीवर्गीय जनावरे ६४ हजार ३८, शेळ्या २ लाख ४० हजार २८०, डुकरे १५५६ आणि घोडे १३ आहेत. हा आकडा पुन्हा वाढणार आहे.