Sangli News : सांगलीकडे पाणी जाण्यासाठी बंद करण्यात आलेले ताकारी योजनेचे पंप मंगळवारी (ता.६) सकाळी पुन्हा सुरू झाल्याने लाभक्षेत्रातील शेतकरी आनंदले. पाण्याची चिंता मिटली आहे. आवर्तन पूर्ण क्षमतेने व शेवटच्या भागात पोहोचेपर्यंत सुरूच राहील, असे कार्यकारी अभियंता राजन डवरी यांनी सांगितले.

ताकारी योजनेच्या लाभक्षेत्रातील पाणी मागणी विचारात घेऊन पाटबंधारे विभागाने ताकारी योजनेचे या वर्षीचे तिसरे व रब्बी हंगामातील दुसरे आवर्तन २२ जानेवारीला रात्रीपासून सुरू केले होते. आवर्तन सुरू झाल्याने सुमारे १८ हजार हेक्टर लाभक्षेत्रातील शेतकऱ्यांतून समाधान व्यक्त होत आहे. कृष्णा नदीपात्र सांगलीजवळ उघडे पडून टंचाई निर्माण झाल्याने चार दिवसांपूर्वी ताकारी व टेंभू योजनेचे निम्मे पंप बंद करण्यात आले.

मुख्य कालवा आटला. साटपेवाडी बंधाऱ्यात आवश्यक पाणी पातळी मिळताच नऊ पंप सुरू करण्यात आले. यातून टप्पा क्रमांक ३ चे ३ व टप्पा क्रमांक ४ चे २ पंप सुरू करून सोनहिरा खोऱ्यासह तडसर परिसरांत पाणी सोडण्यात आले. सध्या टप्पा क्रमांक २ चे ९ पंप सुरू आहेत.

टप्पा क्रमांक ३ चे ३ पंप सुरू असल्याने वांगीसह पुढे वितरिका पूर्ण दाबाने चालत नाहीत. म्हणून टप्पा क्रमांक १ व २ चे ११ पंप सुरू केल्यास वितरिका पूर्ण क्षमतेने चालवावीत अशी मागणी होवू लागली आहे. ताकारी योजनेच्या वाट्याचे या वर्षीचे ३.६ टीएमसी पाणी अद्याप उचलणे बाकी आहे. चालू आवर्तन ३५ ते ४० दिवस देण्याचे नियोजन आहे.