Solapur News : गोदावरी नदीवरील बॅरेजेच्या धर्तीवर सोलापूर जिल्ह्यात भीमा व सीना नदीवर नवे बॅरेज बांधण्यासाठी सर्वेक्षण करा. त्याचा अहवाल ३० एप्रिलपर्यंत अहवाल सादर करा, अशा सूचना जलसंपदामंत्री राधाकृष्ण विखे पाटील यांनी दिल्या. तसेच पूरसंरक्षण घाट बांधण्यासाठी तातडीने प्रस्ताव सादर करण्याचेही आदेश दिले आहेत. त्यानुसार दोन्ही नद्यांवर घाट बांधण्याचे प्रस्ताव लवकरच जलसंपदा विभागाकडे प्रशासकीय मान्यतेसाठी पाठविण्यात येणार असल्याचे जलसंपदा विभागाकडून सांगण्यात आले.

मुंबईत जलसंपदामंत्री विखे पाटील यांच्या उपस्थितीत सोलापूर जिल्ह्यातील जलसुरक्षेसंदर्भात बैठक झाली. या बैठकीस आमदार सुभाष देशमुख, अभिजित पाटील यांच्यासह जलसंपदा विभागाचे अधिकारी उपस्थित होते. या बैठकीत आमदार देशमुख व पाटील यांनी भीमा व सीना नदीवर बॅरेजेस बांधण्याची मागणी केली. उजनी ते हिळ्ळीपर्यंत भीमा नदीवर २४ तर सीना नदीवर एकूण ४७ बंधारे आहेत.

मात्र, ते कालबाह्य झाल्याने त्यांची गळती वाढली आहे. त्यामुळे गोदावरी नदीवरील आणि कर्नाटक सरकारने भीमा नदीवर उमराणी (ता. चडचण, जि. विजयपूर) येथे बांधलेल्या अत्याधुनिक यंत्रणांनी सुसज्ज बॅरेजेसच्या धर्तीवर नवे बॅरेजेस बांधण्याची गरज आहे, याकडे त्यांनी विखे पाटील यांचे लक्ष वेधले.

त्यानंतर विखे पाटील यांनी दोन्ही नद्यांचे सर्वेक्षण करून त्याचा अहवाल ३० एप्रिलपर्यंत सादर करण्याच्या अधिकाऱ्यांना सूचना दिल्या. याप्रसंगी उजनी धरण परिसर पर्यटन विकासाला लवकर गती देण्यासह सुस्ते, अकोले खुर्द बुडीत बंधाऱ्यांच्या अडचणी व उपाययोजना यावरही चर्चा करण्यात आली. तसेच संरक्षक घाट बांधण्यासाठी प्रस्ताव पाठविण्याचे आदेश मंत्री विखे पाटील यांनी अधिकाऱ्यांना दिले. त्यानुसार लवकरच प्रस्ताव प्रशासकीय मान्यतेसाठी जलसंपदा मंत्र्यांकडे पाठविण्यात येणार आहे.

या ठिकाणी पूरसंरक्षक घाट प्रस्तावित

भीमा व सीना नदीवर तेलगाव, भंडारकवठे, सादेपूर, चिंचपूर, पाकणी, तिऱ्हे, अकोले, नंदूर, पिराची कुरोली, पटवर्धन कुरोली, खेड भाळवणी, खेड भोसे, देवडे, चिंचोली, भोसे, शिरढोण, कौढाळी, देगाव, शेळगाव, अर्जुनसोंड, मुंडेवाडी येथे पूरसंरक्षक घाट बांधण्याचा प्रस्ताव पाठविण्यात येणार आहे.