सकाळ न्यूज नेटवर्क
नवी दिल्ली, ता. १३ : चेन्नई येथील प्राइम पॉइंट फाउंडेशन आणि इ- मॅगॅझिनतर्फे दर पाच वर्षांनी देण्यात येणारा संसद महारत्न पुरस्कार राष्ट्रवादी कॉंग्रेसच्या खासदार सुप्रिया सुळे यांना दुसऱ्यांदा जाहीर झाला आहे.

सतराव्या लोकसभेतील त्यांची उपस्थिती, उपस्थित केलेले प्रश्न, खासगी विधेयक आणि सर्वोत्तम कामगिरीसाठी हा पुरस्कार जाहीर झाला असून यापूर्वी सोळाव्या लोकसभेतील कामगिरीसाठीसुद्धा त्यांना या पुरस्काराने सन्मानित करण्यात आले होते. येत्या १७ फेब्रुवारी रोजी हा पुरस्कार त प्रदान करण्यात येणार आहे.

उत्कृष्ट कामगिरी करणाऱ्या खासदारांना प्राइम पॉईंट फाउंडेशनतर्फे हा पुरस्कार देण्यात येतो. माजी राष्ट्रपती डॉ. ए. पी. जे. अब्दुल कलाम यांच्या संकल्पनेतून हा पुरस्कार सुरु करण्यात आला आहे,

असे फाउंडेशनचे के. श्रीनिवासन यांनी कळविले आहे. सतराव्या लोकसभेत सुळे यांच्या कामगिरीतील सातत्य कायम असून ५ डिसेंबर अखेरपर्यंत त्यांनी ९४ टक्के उपस्थिती लावत २३१ चर्चासत्रात भाग घेतला आहे.