Hingoli News: हिंगोली जिल्ह्याला यंदाच्या (२०२५) खरीप हंगामासाठी ८९ हजार ६६९ टन खतांचा पुरवठा मंजूर झाला आहे. खरिपासाठी १ एप्रिलपासून २० हजार ५५८ टन खतांचा पुरवठा झाला असून १५ हजार ७६२ टन खतांची विक्री झाली, अशी माहिती जिल्हा परिषदेच्या कृषी विभागाच्या सूत्रांनी दिली.

कृषी विभागाने खरीप हंगाम २०२५ साठी (एप्रिल ते सप्टेंबर कालावधी) हिंगोली जिल्ह्यासाठी ८२ हजार ३६३ टन खतांची मागणी केलेली असताना कृषी आयुक्तालयाने विविध ग्रेडची ८९ हजार ६६९ टन रासायनिक खते मंजूर केली आहेत. यंदाच्या मागणीच्या तुलनेत ७ हजार ३०६ टन जास्त तर २०२४ च्या खरिपातील ८५ हजार ४५१ टनांच्या तुलनेत ४ हजार २१८ टन एवढी जास्त खते मंजूर करण्यात आली आहेत.

या वर्षी जिल्ह्यात खरिपात ३ लाख ५४ हजार ४५५ हेक्टरवर पेरणी प्रस्तावित आहे. जिल्ह्याचा सरासरी खतांचा वापर ८१ हजार ५६९ टन आहे. त्यानुसार ८२ हजार ३६३ टन रासायनिक खतांची मागणी कृषी आयुक्तालयाकडे नोंदविली होती. परंतु जिल्ह्याला विविध ग्रेडच्या ८९ हजार ६६९ टन रासायनिक खतांचा साठा मंजूर करण्यात आला आहे.

त्यात युरिया १९ हजार ८८५ टन, सुपर फॉस्फेट १७ हजार १०० टन, पोटॅश- एमओपी २ हजार ७२० टन, डीएपी १२ हजार ९६४ टन, संयुक्त खते-एनपीके ३७ हजार टन या खतांचा समावेश आहे. एप्रिलसाठी ६ हजार ३९३ टन, मेसाठी १० हजार ५५४ टन, जूनसाठी २१ हजार ९५९ टन,

जुलैसाठी १९ हजार ५७९ टन, ऑगस्टसाठी १७ हजार ३० टन, सप्टेंबरसाठी १४ हजार १५५ टन खत साठा मंजूर झाला आहे. जूनअखेरपर्यंत ३८ हजार ९०६ टन खते मंजूर आहेत. १ एप्रिलपासून आजवर २० हजार ५५८ टन खतांचा पुरवठा झाला आहे.

१५ हजार टन खतांची विक्री

३१ मार्चअखेर विविध ग्रेडची १८ हजार ३९ टन खते शिल्लक होती. यंदा खरिपासाठी झालेला पुरवठा मिळून एकूण ३८ हजार ५९८ टन खते उपलब्ध होती.त्यापैकी विविध ग्रेडच्या मिळून १५ हजार ७६२ टन खतांची विक्री झाली आहे, अशी माहिती जिल्हा परिषदेच्या कृषी विभागाच्या सूत्रांनी दिली.