Buldana News : राष्ट्रमाता माँ जिजाऊ यांच्या ४२७ व्या जयंतीनिमित्त रविवारी (ता. १२) मातृतीर्थ सिंदखेडराजा येथे राजवाड्यात जन्मस्थळी हजारोंनी अभिवादन केले. प्रामुख्याने सूर्योदयी जिजाऊंच्या वंशजांनी तसेच विविध लोकप्रतिनिधी, अधिकाऱ्यांनी पूजन करीत अभिवादन केले.

सूर्योदयी माँ जिजाऊ यांच्या महापूजेने सोहळ्याची सुरुवात झाली. महाराष्ट्रासह देशभरातून जिजाऊ भक्त मातृतीर्थ नगरीत नतमस्तक होण्यासाठी दाखल झालेले होते. जिजाऊ भक्तांच्या स्वागतासाठी मातृतीर्थ नगरी सज्ज झाली आहे.

रविवारी सूर्योदयावेळी राजे लखुजीराव जाधव यांच्या राजवाड्यामध्ये माँ जिजाऊ यांच्या जन्मस्थळी महापूजा झाली. राजे लखुजीराव जाधव यांचे वंशज, तसेच मराठा सेवा संघाच्या पदाधिकाऱ्यांनी सपत्नीक पूजा केली. जिल्हा परिषद मुख्य कार्यकारी अधिकारी, विविध सामाजिक संघटना, राजकीय पदाधिकारी, अधिकारी हे नतमस्तक झाले.

त्याचबरोबर खासदार सुप्रिया सुळे, आमदार सिद्धार्थ खरात, आमदार मनोज कायंदे, लखुजीराजे जाधव यांचे वंशज शिवाजी जाधव, माजी आमदार डॉ. राजेंद्र शिंगणे, शशिकांत खेडेकर, जिल्हाधिकारी डॉ. किरण पाटील, अपर जिल्हाधिकारी सदाशिव शेलार, उपविभागीय अधिकारी संजय खडसे, तहसीलदार, मुख्याधिकारी यांनी राजमाता जिजाऊ यांच्या जन्मस्थळाचे दर्शन घेऊन अभिवादन केले.

मंत्र्यांचीही हजेरी

जिजाऊ जयंतीदिनी राज्याचे कामगार मंत्री आकाश फुंडकर, केंद्रीय राज्यमंत्री तथा खासदार प्रतापराव जाधव यांनी राजवाड्यातील जन्मस्थळी अभिवादन केले. जिजाऊंच्या जन्मस्थळाचा आगामी वर्षभरात कायापालट झालेला बघायला मिळेल. यासाठी मुख्यमंत्री देवेंद्र फडणवीस यांच्याकडे पाठपुरावा करू, असे आश्‍वासन या वेळी बोलतान मंत्री फुंडकर यांनी दिले.

जिजाऊ सृष्टीवर मुख्य सोहळा

सिंदखेडराजा येथे दुपारी दोन वाजता जिजाऊ सृष्टीवर मराठा सेवा संघाच्या पुढाकाराने मुख्य सोहळा आयोजित करण्यात आला होता. कार्यक्रमाला केंद्रीय राज्यमंत्री प्रतापराव जाधव, मराठा सेवा संघाचे संस्थापक अॅड. पुरुषोत्तम खेडेकर, प्रदेशाध्यक्ष विजयकुमार घोगरे यांच्यासह मान्यवरांना आमंत्रित करण्यात आले होते.