Solapur News : येत्या गाळप हंगामासाठी सोलापूर जिल्ह्यात दीड लाख हेक्टर क्षेत्रातील ऊस गाळपासाठी उपलब्ध होण्याची शक्यता आहे. गतवर्षीच्या तुलनेत यंदा जिल्ह्यातील ६० हजार हेक्टर उसाचे क्षेत्र घटले आहे.

राज्यात सोलापूर जिल्ह्यात सर्वाधिक ऊस क्षेत्रात घट झाल्याचे दिसून येते. त्यामुळे येणाऱ्या गळीत हंगामात साखर कारखान्यांची ऊस गाळपासाठी कसोटी लागणार आहे.

मागील वर्षी पाऊस कमी झाल्याने यंदाच्या उन्हाळ्यात उसासाठी पाण्याची मोठी कमतरता जाणवली. त्यामुळे उसाची म्हणावी तशी वाढ झाली नाही.

राज्यात ऊस उत्पादन घेणाऱ्या सोलापूरसह २७ जिल्ह्यांपैकी २१ जिल्ह्यांत उसाचे क्षेत्र मोठ्या प्रमाणावर घटले आहे. त्यामुळे ऊस उत्पादनात मोठी घट होणार आहे. सोलापूर जिल्ह्यात मागच्या वर्षी २ लाख १० हजार ९७० हेक्टर उसाचे क्षेत्र होते, यंदा ते १ लाख ५० हजार ५८६ हेक्टरवर आले आहे. साधारण ६० हजार ३७१ हेक्टरने क्षेत्रात घट झाली आहे.

सोलापूर विभागात (सोलापूर व धाराशिव जिल्हे मिळून) सर्वाधिक एक लाख तीन हजार ४६५ हेक्टर उसाचे क्षेत्र घट झाली आहे. गतवर्षीचे राज्यातील हेक्टरी टनेज गृहीत धरले तर राज्यात या वर्षी १८३ लाख टन ऊस उत्पादन कमी होण्याचा संभव आहे. त्या टनेजनुसार सोलापूर जिल्ह्यात ४६ लाख टन, तर धाराशिव जिल्ह्यात ३३ लाख टन ऊस उत्पादनात घट होण्याचा अंदाज आहे.