Pune News : शिरूर तहसील कार्यालयात महसूल सहाय्यक, अव्वल कारकून यांची तब्बल १३ पदे रिक्त आहेत. मोजक्या कर्मचाऱ्यांकडून शिरूर तालुक्याचा गाडा हाकला जात आहे. तालुकाभरातून आलेल्या प्रकरणांचा निपटारा करणे रिक्त पदांमुळे अडचणीचे बनले आहे.

लवकरात लवकर उचित कार्यवाही करून ही पदे तातडीने भरण्याची मागणी नागरिकांकडून करण्यात येत आहे. शिरूर तहसील कार्यालयामध्ये महसूल सहाय्यक व अव्वल कारकून यांची अनेक पदे रिक्त आहे.

एकीकडे काही भ्रष्ट कर्मचाऱ्यांमुळे जनतेची होणारी ससेहोलपट, तर दुसरीकडे मोठ्या प्रमाणात जागा रिक्त असल्याने व काही अधिकाऱ्यांवर अतिरिक्त कार्यभार असल्याने सर्वसामान्य नागरिक शेतकऱ्यांना मात्र तहसील कार्यालयात चकरा माराव्या लागत आहेत. यातून नागरिकांचे मानसिक, शारीरिक, आर्थिक नुकसान होत आहे.

रिक्त जागांचा तपशील

महसूल सहाय्यक यांची एकूण मंजूर पदे १७ असून, कार्यरत पदे ७ आहेत. तर १० पदे रिक्त आहेत. अव्वल कारकून यांची एकूण मंजूर पदे ९ आहेत, तर कार्यरत पदे ७ आहेत. रिक्त पदे २ दोन आहेत. मंडल अधिकारी यांची मंजूर पदे १० आहेत. कार्यरत पदे ९, तर रिक्त पद १ आहे.