Solapur News : शासनाने जाहीर केल्यानुसार दुधाला प्रती लिटर पाच रुपये अनुदान देण्यात येणार आहे, त्यासाठी मोहोळ तालुक्यातील सुमारे तीस हजार जनावरांचे टॅगिंग करण्याचे काम युद्धपातळीवर सुरू असून, यामुळे माणसाप्रमाणे जनावरांचाही डाटा तयार होणार आहे, अशी माहिती पंचायत समितीचे पशुधन विकास अधिकारी डॉ. प्रदीप रणवरे यांनी दिली.

दुधाचे दर कमी झाल्याने अनुदानाची मागणी होत होती, त्यानुसार हे अनुदान जाहीर झाले आहे. पण त्यासाठी जनावरांचे टॅगिंग महत्त्वाचे आहे. त्यासाठी ही मोहीम सुरू आहे. मोहोळ तालुक्यात एकूण गाईंची संख्या ९० हजार एवढी आहे.

नव्याने खरेदी झालेली व व्यालेली जनावरांची संख्या ही मोठी आहे. दूध व्यवसाय हा तालुक्यातील शेतकऱ्यांचा मुख्य व्यवसाय आहे. अनुदान देय जनावरांची संख्या निश्चित करण्यासाठी दूध संकलन केंद्र चालकांना शेतकऱ्यांनी आणलेल्या दुधाचे फॅट शासनाला कळविणे बंधनकारक केले आहे.

तसेच कानाला टँगिंग मारताना जनावरांचा फोटो, मालकाचा मोबाइल नंबर या सर्व गोष्टी ‘भारत पशुधन’ या ॲपवर अपलोड करावयाच्या आहेत. त्यासाठी काही मानधनावर खासगी ५४ जणांची नियुक्ती केली आहे. माणसांचे ज्याप्रमाणे कुठल्याही व्यवहारासाठी टॅगिंग अनिवार्य असल्याचे डॉ. रणवरे यांनी सांगितले.

जनावरांना टॅगिंग आवश्यकच

नैसर्गिक आपत्तीत मृत्यू पावलेल्या जनावरांना मदत देण्यासाठी, तसेच विविध रोगांवर औषधोपचार करण्यासाठी आधार कार्ड बंधनकारक असून, ज्या शेतकऱ्यांनी अद्यापही जनावरांना टॅगिंग मारून घेतले नाहीत, त्यांनी ते मारून घ्यावेत. ज्या जनावरांच्या कानाला बिल्ले आहेत, तीच जनावरे अधिकृत धरली जाणार आहेत, असेही डॉ. रणवरे यांनी सांगितले.