Jalgaon Agriculture News : खानदेशात कांदा काढणीला (onion Harvesting) वेग आला आहे. उत्पादन एकरी १०० ते ११० क्विंटलपर्यंत येत आहे. उत्पादन काही शेतकरी अधिक मिळवित आहेत. पण दर समाधानकारक नाहीत.

पावसाळी वातावरणातही कांदा काढणी खानदेशात सुरू होती. डिसेंबरमध्ये लागवड केलेल्या कांद्याची काढणी सुरू आहे. तर जानेवारी व जानेवारीच्या मध्यात लागवड केलेल्या कांद्याची काढणी पुढील आठवड्यात सुरू होईल. उष्णता असल्याने मजूरटंचाईदेखील आहे.

काढणीसाठी एकरी पाच ते साडेपाच हजार रुपये खर्च किमान येत आहे. जळगाव जिल्ह्यात यंदा सुमारे अडीच हजार हेक्टरवर कांदा लागवड झाली होती. तसेच धुळे व नंदुरबारात मिळून सुमारे पाच हजार हेक्टरवर कांदा पीक होते. लागवड अपेक्षेपेक्षा कमी झाली. परंतु दर कमीच आहेत.

जळगाव जिल्ह्यात सर्वाधिक लागवड यावल, चोपडा, जळगाव, धरणगाव, एरंडोल, चाळीसगाव आदी भागात झाली होती. तसेच धुळ्यात साक्री, धुळे तालुक्यात अधिकची लागवड झाली होती.

नंदुरबार तालुक्यात नंदुरबार व नवापुरात कांदा लागवड बऱ्यापैकी झाली होती. कांदा लागवडीच्या वेळेसही कांदा दर कमी होते व आता काढणी सुरू झालेली असतानादेखील दर कमी आहेत.

अनेकांना उत्पादन खर्च वजा करून कांदा पीक परवडत नसल्याचे दिसत आहे. दर्जेदार कांदा पीक खानदेशात होते.