Pune News : आंबेगाव तालुक्याचे मध्यवर्ती ठिकाण मंचर येथे कृषी उत्पन्न बाजार समितीच्या आवारात शेतकऱ्यांनी उत्पादित केलेले सोयाबीन खरेदी केंद्र लवकरच सुरू करण्यासाठी मंचर बाजार समिती प्रयत्न करेल, असे कृषी उत्पन्न बाजार समितीचे उपसभापती सचिन पानसरे यांनी सांगितले.

मंचर येथे सोयाबीन खरेदी केंद्र सुरू करावे, अशी मागणी स्वाभिमानी शेतकरी संघटनेचे पुणे जिल्हा अध्यक्ष प्रभाकर बांगर व शेतकऱ्यांनी पानसरे यांची भेट घेऊन केली. या वेळी बाजार समितीचे संचालक अरुण बांगर, देवगावचे माजी सरपंच बाबाजी गावडे, शेतकरी संघटनेचे प्रकाश कोळेकर, संतोष पवार, वनाजी बांगर आदी शेतकरी उपस्थित होते.

प्रभाकर बांगर म्हणाले, ‘‘आंबेगाव तालुक्यात सध्या पाच हजार एकर क्षेत्रावर सोयाबीनचे उत्पादन घेतात. दर वर्षी सोयाबीन पीक लागवड क्षेत्रात वाढ होत आहे. शासनाने सोयाबीनचा खरेदी दर ४ हजार ८९२ रुपये प्रति क्विंटल जाहीर केला आहे.

पण मंचर येथे सोयाबीन खरेदी केंद्र नसल्याने खाजगी व्यापारी ४ हजार ते ४ हजार १०० रुपये प्रती क्विंटल बाजार भावाने सोयाबीन खरेदी करून शेतकऱ्यांची लूट करतात. शेतकऱ्यांना योग्य बाजार भाव मिळण्यासाठी सोयाबीन खरेदी केंद्र बाजार समितीने सुरू करावे.