Nagar News : चांगल्या पावसामुळे खरिपातील सोयाबीन पीक जोमात असताना ज्या भागात अधिक पाऊस झाला तेथे पीक पिवळे पडत आहे. परिणामी, नुकसान होण्याची भीती व्यक्त केली जात आहे. नगर जिल्ह्यासह राज्यातील काही भागांत हा प्रादुर्भाव झाला आहे. सोयाबीन पिक पिवळे पडण्याबाबत मात्र कृषी विभागाने अजूनही दखल घेतल्याचे दिसत नाही.

राज्यातील बहुतांश भागात यंदा पाऊस चांगला आहे. सातत्याने पाऊस येत असून काही भागात अतिवृष्टी झाली. सततच्या पावसामुळे शेतात पाणी साचून राहिले. त्या भागात सोयाबीन पिवळे पडत असून फुले व शेंगाही पुरेसा लागलेल्या दिसत नाहीत.

गेल्या वर्षी अनेक भागात सोयाबीनवर पिवळ्या मोझॅकचा प्रादुर्भाव झाला होता. त्यामुळे सोयाबीन उत्पादनावरही परिणाम झाला होता. यंदाही गतवर्षीसारखेच सोयाबीन पिवळे पडत आहे. सोयाबीन पीक पिवळे पडण्याचे वेगवेगळी कारणे असली तरी गतवर्षीसारखच यंदाही उत्पादनावर परिणाम होण्याची भीती शेतकरी व्यक्त करत आहेत.

मी पावसामुळे हे पीक पिवळे पडले असण्याचा आमचा अंदाज आहे. आम्ही तालुका कृषी कार्यालयाला कळवले, पण अजून शेतात पाहणी करायला कोणीही आले नाही, असे नेवासा खुर्द येथील शेतकरी राजेंद्र लोखंडे यांनी सांगितले.