Nashik News : कृषी क्षेत्रातील उद्योग व्यवसाय जीएसटी देतात.मात्र संबंधित कार्यालयाकडे पूर्तता केल्यानंतर त्यांना जीएसटी परतावा मिळतो. मात्र शेतकरी कृषी निविष्ठा, यांत्रिकीकरण खरेदी करताना जीएसटी भरत असतो. मात्र कुठलाही कर परतावा दिला जात नाही. एकीकडे शहरातील मंडळी शेतकरी कर भरत नसल्याचे सांगतात. त्यामुळे कर भरणाऱ्या शेतकऱ्यांनाही परतावा मिळाला पाहिजे, असे मत महाराष्ट्र राज्य द्राक्ष बागायतदार संघाचे अध्यक्ष कैलास भोसले यांनी केले.

पिंपळगाव बसवंत येथे प्रयोगशील संशोधक शेतकरी प्रवीण मोगल यांनी विकसित केलेल्या ‘लो-व्हॉल्यूम स्प्रेयर’ यंत्रांच्या अनावरण प्रसंगी ते बोलत होते. या वेळी राष्ट्रीय फलोत्पादन मंडळाचे संचालक माणिकराव पाटील, नाशिक विभागीय मानद सचिव बबनराव घोलप, द्राक्ष बागायतदार संघाचे माजी अध्यक्ष अशोक गायकवाड, देवराम मोगल, माजी मानद सचिव अरुण मोरे, दाभोळकर प्रयोग परिवाराचे मुख्य समन्वयक वासुदेव काठे, अनंत मोरे, सह्याद्री फार्मर्स प्रोड्यूसर कंपनीचे ॲग्रोनॉमिस्ट सचिन वाळुंज, रामराव मोगल, प्रवीण मोगल, सचिन मोगल उपस्थित होते.

भोसले म्हणाले, की कृषी उपज योजनाअंतर्गत एकूण द्राक्ष निर्यातीच्या ७ टक्के निर्यात परतावा मिळत होता. मात्र पुढे ‘रोडटेप योजनेअंतर्गत बदल झाले. पूर्वी ९ ते १२ रुपये मिळत असताना आता अवघे किलोमागे ३ रुपये मिळत आहेत त्यात अवघी ३० पैसे वाढ झाली. त्यामुळे पूर्वीप्रमाणेच परतावा मिळण्यासाठी पाठपुरावा करण्यात येत आहे. त्यातून निर्यातदार व शेतकऱ्यांना लाभ होईल असेही त्यांनी नमूद केले.

या वेळी द्राक्ष शेतीत प्रयोगशीलतेने काम करणाऱ्या महिला द्राक्ष उत्पादकांचाही सन्मान करण्यात आला. आदर्श कामकाज करून दाखवावे, अशी अपेक्षा भोसले यांनी बोलताना व्यक्त केली. या वेळी सह्याद्री फार्मर्स प्रोड्यूसर कंपनीचे अध्यक्ष विलास शिंदे, वासुदेव काठे, अनंत मोरे आदींची मनोगत झाली.