Solapur News : सोलापूर ते धाराशिव रेल्वे मार्गासाठी संपादित होणाऱ्या जमिनीसाठी दिलेल्या मोबदल्याच्या घोषित निवाड्यामध्ये अल्पमोबदला दिल्याचा आक्षेप घेत मार्डी (ता. उत्तर सोलापूर) येथील शेतकऱ्यांनी जिल्हाधिकारी कुमार आशीर्वाद यांना निवेदन दिले आहे. अॅड. इंद्रजित पाटील यांच्या नेतृत्वाखाली हे निवेदन देण्यात आले.

राजेंद्र इनामदार, रणजित काटे, सुनील खर्डे, राम खर्डे, मुकुंद पाटील, गजेंद्र इनामदार, नारायण माळी, भगवंत देशमुख, गणेश पाटील, राहूल राठोड आदींसह अनेक शेतकरी या वेळी उपस्थित होते.

या बाबत माहिती अशी, की मार्डी येथील एकूण ६२ गटातील ३८.९३ हेक्टर आर इतके क्षेत्र या महामार्गासाठी संपादित करण्याबाबत या आधीच निवाडा घोषित केला आहे. सदरचा निवाडा घोषित करत असताना २०१९-२०, २०२०-२१ आणि २०२१-२२ या कालावधीतील खरेदी-विक्रीचा तक्ता विचारात घेतला गेला आहे.

असे असताना जिरायत, बागायत आणि बिगरशेती प्रतवारीनुसार या तक्त्याचा विचार करता २०१९ मध्ये जादा रक्कम खरेदी-विक्रीमध्ये दिसून येते, ही वस्तुस्थिती आहे. पण २०२१ आणि २०२२ मध्ये मात्र कमी रकमेचे व्यवहार झाल्याचे दर्शविण्यात आले आहे आणि त्याआधारे जमिनीला सरासरी किंमत कमी दर्शविण्यात आली आहे.

मोबदल्यासाठी गुणांकपद्धती चुकीची

या मार्गाच्या संपादन अधिकाऱ्यांनी आपल्या अधिकाराचा दुरुपयोग केल्याचेही शेतकऱ्यांनी निदर्शनास आणून दिले आहे. वास्तविक, या मोबदला देताना ग्रामीण भागासाठी गुणांकपद्धतीचा विचार केला जातो, त्यात ग्रामीण भागासाठी ४ गुणांक आणि शहरी भागासाठी २ गुणांक असताना, प्रत्यक्षात गुणांक १ नुसार आम्हाला ग्रामीण भागासाठी मोबदला नमूद केला आहे, याकडेही लक्ष वेधण्यात आले आहे.