Amravati News: छत्रपती शिवाजी महाराज शेतकरी सन्मान योजनेअंतर्गत शेतकऱ्यांना दीड लाख रुपयांपर्यंतच्या कर्जमाफीचा निर्णय घेण्यात आला होता. २०१७ मध्ये या संदर्भातील घोषणा झाल्यानंतर गेल्या आठ वर्षांत निकषांची पूर्तता करुनही तब्बल ६.५६ लाख शेतकरी योजनेच्या लाभापासून वंचित असल्याचे धक्‍कादायक वास्तव समोर आले आहे.

राज्यातील अल्प आणि अत्यल्प भूधारकांना दिलासा देण्याच्या उद्देशाने तत्कालीन सरकारकडून छत्रपती शिवाजी महाराज शेतकरी सन्मान योजना जाहीर करण्यात आली होती. या अंतर्गत लहान शेतकऱ्यांकडील दीड लाख रुपयांचे कर्ज माफ करण्याचे प्रस्तावित होते. १ एप्रिल २००९ नंतर पीक तसेच मध्यम मुदत कर्ज घेतले असेल व ते ३० जून २०१६ रोजी थकीत असेल अशा शेतकऱ्यांचे मुद्दल व व्याजासह दीड लाख रुपये माफ करण्यात येणार होते.

त्यानुसार वर्ष २०१८ पर्यंत ४०.२१ लाख शेतकऱ्यांच्या खात्यात १६,६६९.७५ कोटी रुपये जमा करण्यात आले. कर्जमाफीसाठी राज्यभरातील सुमारे ५०.६० लाखांवर शेतकरी पात्र ठरले होते. मात्र त्यातील काहीच शेतकऱ्यांना योजनेचा लाभ मिळाला. गेल्या आठ वर्षांपासून तब्बल ६.५६ लाखांवर शेतकरी योजनेच्या लाभापासून वंचित असल्याचे धक्‍कादायक वास्तव आहे.

दरम्यान छत्रपती शिवाजी महाराज शेतकरी सन्मान योजनेच्या धर्तीवर महात्मा ज्योतिराव फुले शेतकरी कर्जमुक्‍ती योजना देखील शासनाकडून राबविण्यात आली होती. या माध्यमातून पात्र ३२.४२ लाख शेतकऱ्यांपैकी ३२.२७ लाख शेतकऱ्यांना कर्जमाफीचा लाभ देण्यात आला आहे.

असे होते निकष

कर्ज माफीचा लाभ घेण्यासाठी आधार, पॅन, बॅंक खात्याचा तपशील, सातबारा अशा बाबींची पूर्तता करण्यास शेतकऱ्यांना सांगण्यात आले होते. त्यासोबतच सामूहिक सुविधा केंद्रांवर (सीएससी) नोंदणीची ऑनलाइन प्रक्रियाही पार पाडावी लागली होती.

प्रलंबित लाभार्थ्यांची सरकार घेतेय माहिती

राज्यात सहा लाखांवर शेतकरी कर्जमाफीपासून वंचित असल्याची बाब सहकारमंत्री बाबासाहेब पाटील यांनी विधानसभेत एका प्रश्‍नाच्या उत्तरात मान्य केली. जिल्हा तसेच राज्यस्तरीय बॅंकर्स समितीकडून पात्र व प्रलंबित लाभार्थ्यांची माहिती घेण्यात येत असल्याचे त्यांनी सभागृहाला सांगितले.