Nanded News: पंतप्रधान सूक्ष्म सिंचन योजनेसह ‘पोकरा’ प्रकल्पांतर्गत बनावट दस्तऐवज तयार करून तुषार सिंचन व ठिबक संच वितरणात शासनाची ६ कोटींची फसवणूक केल्याप्रकरणी दोन कृषी पर्यवेक्षकांसह सहा कृषी सहायकांविरोधात गुन्हा दाखल करण्यात आला होता.

या प्रकरणात अखेर विभागीय कृषी सहसंचालकांनी ६ कर्मचाऱ्यांना निलंबित केले आहे. तर दोन कृषी अधिकाऱ्यांच्या निलंबनाचा प्रस्ताव कृषी आयुक्तालयाकडे पाठविण्यात आला आहे, अशी माहिती सूत्रांनी दिली.

विभागीय कृषी सहसंचालक साहेबराव दिवेकर यांनी २७ मे रोजी कृषी पर्यवेक्षक रोहिणी पवार, आर. पी. जाधव, कृषी सहायक एस. बी. बनसोडे, एस. व्ही. दबडे, आर. एस. पाटणकर, आर. जे. चव्हाण, एस. एच. कचलकवार, एच. पी. नव्हारे यांना निलंबित केले आहे.

तर मंडळ कृषी अधिकारी आर. जे. मरदोडे व जे. डी. पवार यांच्या निलंबनाचा प्रस्ताव कृषी आयुक्त कार्यालयाकडे पाठविण्यात आला आहे. यातील कृषी पर्यवेक्षक एम. बी. बेस हे सेवानिवृत्त झाले आहेत.