Chh. sambhajinagar News : मत्स्य व्यवसाय विभागामार्फत १४ ते २२ दरम्यान प्रधान मंत्री मत्स्य किसान समृद्धी सहयोजनेअंतर्गत राष्ट्रीय मत्स्य व्यवसाय डिजिटल प्लॅटफॉर्मवर नोंदणीसाठी मत्स्य व्यवसाय विभाग, राष्ट्रीय मात्स्यिकी विकास मंडळ (NFDB) व सेवा केंद्र यांच्या माध्यमातून विशेष मोहीम आयोजित करण्यात आली आहे.

याअनुषंगाने, छत्रपती संभाजीनगर, लातूर व नाशिक विभागातील मच्छीमार, मत्स्यविक्रेते, मत्स्यकास्तकार, मत्स्य उद्योजक, योजनेचे लाभार्थी व मत्स्यव्यवसायाशी निगडित भागधारकांची नोंदणी करणे व त्यांचेपर्यंत योजनेची व्याप्ती, माहिती पोहोचविण्याकरिता रविवारी (ता. १६) शासकीय अभियांत्रिकी महाविद्यालय येथे कार्यशाळा आयोजित करण्यात आली होती.

छत्रपती संभाजी नगरचे प्रादेशिक उपआयुक्त मत्स्य व्यवसाय वि. बा. शिखरे, लातूरचे प्रादेशिक उपआयुक्त मत्स्य व्यवसाय शि. ग. गाताडे, यांच्या अध्यक्षतेखाली ही मोहीम राबविण्यात आली. उपस्थित मच्छीमारांना योजनेमुळे होणारे लाभ, त्याचे महत्त्व सांगितले. सहाय्यक आयुक्त मत्स्यव्यवसाय, छत्रपती संभाजीनगर डॉ. मधुरिमा जाधव, यांनी प्रास्ताविक केले.

तसेच समन्वयक प्रशांत सोनवणे, सहायक संचालक, मत्स्यव्यवसाय डॉ. तरुणकुमार सिंग यांनी दूरदृश्‍य प्रणालीद्वारे योजनेची माहिती दिली. प्रशांत तमखाने यांनी नोंदणीबाबत मार्गदर्शन केले.

छत्रपती संभाजीनगर, लातूर व नाशिक विभागातील १३ जिल्ह्यांचे सहायक आयुक्त मत्स्य व्यवसाय, मत्स्य व्यवसाय विकास अधिकारी, सहायक मत्स्य व्यवसाय विकास अधिकारी व इतर कर्मचारी तसेच सेवा केंद्राचे कर्मचारी आणि ८०० हून अधिक मच्छीमार/मत्स्यविक्रेते/ मत्स्यकास्तकार/ मत्स्य उद्योजक/ योजनेचे लाभार्थी/ व मत्स्य व्यवसायाशी निगडित भागधारक मोठ्या संख्येने सहभागी झाले होते.

या मोहिमेमार्फत मत्स्य व्यवसायाशी निगडित सर्व भागधारकांना नोंदणी प्रक्रिया, मंजुरी दर वाढविणे, प्रधानमंत्री मत्स्य किसान समृद्धी योजनेतून कर्ज सुविधा, मत्स्यपालन विमा, अनुदान या सारख्या लाभांसाठी प्रोत्साहित करणेकरण्याबाबत माहिती देण्यात आली.