Kolhapur News : जिल्‍ह्यात सातत्यपूर्ण पावसामुळे नद्यांच्या पाण्यात वाढ होतच आहे. नदीकाठावरील शेती पाण्याखाली जाण्यास सुरुवात झाली आहे. दरम्यान सोमवारच्या तुलनेत मंगळवार (ता. १७) दुपारपर्यंत अनेक ठिकाणी पावसाचा जोर कमी होता.

यामुळे काहीसा दिलासा मिळाला. नद्यांच्या पाणीपातळीत दहा फुटांनी वाढ झाली. राजाराम बंधाऱ्यासह १७ बंधारे पाण्याखाली गेले. राधानगरी धरणासह तुळशी, वारणा, दुधगंगा, कासारी, धामणी धरणातून विसर्ग वाढल्याने नदीकाठच्या गावांना सतर्कतेचा इशारा देण्यात आला आहे.

मंगळवारी सकाळपर्यंत राधानगरी धरणाक्षेत्रण क्षेत्रावर १७२ मिलिमीटर पावसाची नोंद गेल्या २४ तासांत झाली असून, पाण्याची आवक वाढल्याने सेवाद्वार उघडण्याची वेळ आली आहे. पायथा वीजगृहातून पंधराशे क्यूसेक पाण्याचा विसर्ग सुरू होता.

यामध्ये सेवा द्वारातून आणखी एक हजार क्यूसेक विसर्गाची भर पडली आहे. पाऊस असाच राहिल्यास यंदा लवकरच हे धरण भरण्याची स्थिती आहे. काळम्मावाडी आणि तुळशी धरण क्षेत्रात अतिवृष्टी नोंद झाली आहे.

मंगळवारी सकाळपासून धरणक्षेत्र वगळता अन्य तालुक्यात पाऊस थांबल्‍याचे चित्र होते. अनेक ठिकाणी थांबून थांबून काही कालावधीसाठी हलका ते मध्यम पाऊस व परत ऊन सावलीचा खेळ असे चित्र होते. नद्यांचे पाणी वाढत असल्याने अनेक शेतकऱ्यांनी नदी काठावरील कृषिपंप काढण्यासाठी गर्दी केल्याचे चित्र होते.