Palghar News : पालघर जिल्ह्यात आदिवासी विकास महामंडळाकडून शेतकऱ्यांच्या भाताची खरेदी केलेली आहे. आता जून उजाडला तरी सरकारने जाहीर केलेला बोनस अजूनपर्यंत जमा करण्यात आलेला नाही.

हा बोनस तातडीने शेतकऱ्यांच्या खात्यात जमा करावा, अन्यथा काँग्रेस आंदोलन छेडेल, असा इशारा काँग्रेसचे जिल्हा अध्यक्ष प्रफुल पाटील यांनी निवेदनाद्वारे दिला आहे. नोंदणी केलेल्या प्रत्येक शेतकऱ्याला सरकारने बोनस देण्याचे धोरण आहे; परंतु ही बोनसची रक्कम आजतागायत शेतकऱ्यांना अदा करण्यात आलेली नाही.

त्यामुळे एेन हंगामात शेतकऱ्यांना विविध अडचणींना सामोरे जावे लागत आहे. या वेळी काँग्रेसचे पालघर जिल्हा अध्यक्ष प्रफुल्ल पाटील, तालुका अध्यक्ष दिलीप पाटील, किसान तालुका अध्यक्ष जयंत पाटील, वाडा तालुका उपाध्यक्ष गिरीश पाटील, राष्ट्रवादी काँग्रेसचे अजित चौधरी उपस्थित होते.

काँग्रेसचा आंदोलनाचा इशारा

सध्या शेतीचा हंगाम सुरू असून, भातपेरणीची कामे सुरू झाली आहेत; मात्र शेतकऱ्यांकडे शेतीसाठी पुरेसे पैसे नसल्याने पेरणी करणे शक्य होत नाही. त्यामुळे मोठ्या प्रमाणात भातशेती लागवडीखाली येणार नाही व मजुरांच्या हाताला काम मिळणार नाही.

त्यामुळे संबंधित मंडळाकडे नोंदणी केलेल्या शेतकऱ्यांना तातडीने भातविक्रीपोटी बोनस रक्कम देण्यात यावी. त्या कामी प्रशासनाकडून संबंधित महामंडळाला योग्य दिशा निर्देश देण्यात यावेत; अन्यथा काँग्रेस आंदोलन छेडेल, असा इशारा प्रफुल्ल पाटील यांनी निवेदनातून दिला.