ॲग्रोवन वृत्तसेवा
Chana MSP : अकोला ः किमान आधारभूत किमतीने (MSP) या हंगामात सुरु असलेल्या हरभरा खरेदीला आता केवळ तीन दिवस शिल्लक आहेत.

त्यात आता राज्यातील अकोला, बुलडाणा, अमरावती, वाशीम, यवतमाळ या काही प्रमुख हरभरा उत्पादक (Chana Producer) जिल्ह्यांतील हरभरा खरेदीचे उद्दिष्ट निर्बंध मुक्त केले आहे. या नवीन आदेशामुळे खरेदी प्रक्रियेला किती प्रमाणात फायदा होईल, याबाबत साशंकता आहे.

संबंधित जिल्ह्यांना दिलेली उद्दिष्ट मर्यादा उठवण्यात आली आहे. नोंदणी केलेल्या तथापि एसएमएस न दिलेल्या शेतकऱ्यांना आवश्‍यकतेनुसार संदेश द्यावेत व उर्वरित हरभरा खरेदी केली जावा, असे निर्देश या सुधारित आदेशाद्वारे देण्यात आले आहेत.

यंदाच्या रब्बीमध्ये उत्पादित झालेला राज्यातील हरभरा १४ मार्चपासून ५३३५ रुपये प्रतिक्विंटल हमीभावाने खरेदीला सुरुवात करण्यात आली. यंदा प्रत्येक जिल्ह्याला उत्पादकतेवर आधारित उद्दिष्ट देण्यात आले. याचा फटका सुरुवातीच्या टप्‍प्यात बसला.

खरेदी उद्दिष्ट अवघ्या काही दिवसातच पूर्ण झाले. परिणामी सुधारित उदिष्टाच्या प्रतीक्षेत अनेक दिवस खरेदी प्रक्रिया ठप्प होती. आतापर्यंत हरभरा खरेदीचे दोनदा उद्दिष्ट वाढवून देण्यातही आले. परंतु हे धोरण हरभरा उत्पादकांच्या मुळावर उठले.

नवीन उद्दिष्ट नेमून देईपर्यंत आणि सुधारित आदेश यंत्रणांपर्यंत जाईपर्यंत बराच वेळ गेला. खरेदी प्रक्रिया या कारणाने तसेच बारदान्यामुळेही बंद राहिली. शिवाय शासकीय सुटीच्या दिवशी खरेदीला सुटी दिल्याने शेतकऱ्यांना फटका बसला आहे.

हजारो शेतकऱ्यांचा हरभरा खरेदी झालेला नाही. हंगाम तोंडावर दिसत आहे. तसेच संपूर्ण हरभरा खरेदी केला जाण्याची शक्यता नसल्याने शेतकऱ्यांनी कमी दराने बाजार समित्यांमध्ये हरभरा विकल्याची स्‍थिती आहे.

उशिरा निघाले आदेश
यंदाच्या हरभरा खरेदीला सुरुवातीपासून गोंधळाचा फटका बसला. उद्दिष्ट वाढवून देण्यासाठी बराच वेळ गेला. शेतकऱ्यांना एसएमएस दिलेले असूनही तेव्हा खरेदी बंद राहिल्याने मोजणी होऊ शकली नाही.

आता ११ जूनपर्यंत राज्यात हरभरा खरेदीची मर्यादा आहे. त्यामुळे निर्बंध शिथिल केल्याचा फायदा किती प्रमाणात होईल, याबाबत साशंकता आहे. हाच निर्णय सुरवातीपासून असता तर खरेदी आकड्यात निश्‍चितच वाढ झाली असती.