Pune News : शासकीय कागदपत्रांमध्ये फेरफार करून, बनावट दस्ताऐवजतून राखीव वन जमीन हडपल्याप्रकरणी जुन्नर बाजार समितीचे माजी सभापती रघुनाथ लेंडे यांच्यासह पत्नी, मुलगा आणि दस्तनोंदणी अधिकाऱ्यांसह ११ जणांविरोधात जुन्नर वन विभागाने फिर्याद दाखल केली आहे. त्यानुसार जुन्नर पोलिसांनी गुन्हे दाखल केले आहेत.

याबाबत उपवनसंरक्षक अमोल सातपुते यांनी वन विभागाकडे दाखल केलेल्या तक्रार अर्जाची चौकशी करून जुन्नरचे वन परिक्षेत्र अधिकारी प्रदीप चव्हाण यांना प्राथमिक चौकशी करण्याचे आदेश दिले होते. या प्राथमिक चौकशीअंती राखीव वनक्षेत्राचे बनावट खरेदीखत झाल्याचे निष्पन्न झाले.

यामुळे संबंधिताविरुद्ध फौजदारी कारवाई सुरू करण्याच्‍या लेखी सूचना उपवनसंरक्षक कार्यालयाने करण्याबाबत कळविले होते. याप्रकरणी केलेल्या चौकशीत कुरण येथील नवीन गट नंबर ४४२ व ४५४ (जुना सर्व्हे नं ९६) तसेच नवीन गट नंबर ४५२(जुना सर्व्हे नं ९५) चे ‘राखीव वन’ दर्जा असलेल्या जमिनीच्या गैरव्यवहार प्रकरणात बनावट दस्ताच्या आधारे दस्तनोंदणी झाल्याचे तसेच अधिसूचनेमध्ये फेरफार करून, राखीव वन जमीन हस्तांतर व्यवहार झाला असल्याचे आढळून आल्याने ही फिर्याद देण्यात आली आहे.

महसूल विभागाकडून अरुण देशमुख यांना हे राखीव वनक्षेत्र उपजीविकेसाठी शेती प्रयोजनार्थ वाटप झाले होते. या बाबतच्या महसूल विभागाच्या अटी व शर्तींचा भंग झाला असल्याचे तपासात निष्पन्न झाले आहे.

वन जमिनीच्या बनावट दस्तांच्या आधारे वन विभागाची फसवणूक जुन्नर, कुरण, पिंपळवंडी, वानेवाडी येथील व्यक्ती तसेच तत्कालीन दुय्यम निबंधक व पुराभिलेख संचालनालयातील तत्कालीन कर्मचारी या शासकीय कर्मचाऱ्यांनी केली असल्याचे चव्हाण यांना चौकशीत दिसून आले.

कुरण येथील दोन्ही गट नंबरच्या दस्तनोंदणी गैरव्यवहारप्रकरणी अरुण देशमुख, अलका लेंडे, शुभांगी देशमुख, अनिकेत लेंडे, शकुंतला गणेशकर, रोहन गणेशकर, रघुनाथ लेंडे, तत्कालीन सहायक संचालक, पुराभिलेख संचालनालय, मुंबई येथील अज्ञात व्यक्ती तसेच नारायणगावचे तत्कालीन दुय्यम निबंधक यांच्याविरुद्ध वन विभागाच्या जमिनीचे कटकारस्थान, फसवणूक व बनावट दस्ताच्या आधारे अपहार करून गैरलाभ घेतला असल्याचे फिर्यादीत नमूद केले आहे.