Vasai News : मराठा आरक्षणासाठी संपूर्ण राज्यात वातावरण ढवळून निघाले आहे. त्यानंतर राज्य सरकारने सकारात्मक भूमिका घेतली. सर्वेक्षण करण्याचे निर्देश शासकीय विभागाला दिले आणि सर्व्हे सुरू झाला. वसई-विरार महापालिका परिसरात प्रभागनिहाय सर्वेक्षण पूर्ण करण्यात आले.

यात मराठा व खुल्या प्रवर्गातील कुटुंबांची संख्या ६५ हजार ७२५ आणि आरक्षित प्रवर्गातील कुटुंब संख्या सहा लाख १६ हजार ७१९ असल्याचे सर्वेक्षणातून समोर आले आहे. वसई-विरार शहरात मोठ्या प्रमाणात मराठा समाज वास्तव्यास आहे. या समाजाकडून आरक्षणाची मागणी करण्यात येत आहे.

त्यामुळे काही वर्षांपासून आरक्षणाच्या मुद्द्याने राज्यभरातील वातावरण बदलले. त्यातच मराठा आरक्षणाबाबत राज्य मागास आयोगाच्या आदेशानुसार, २३ जानेवारीपासून महापालिका प्रशासक अनिलकुमार पवार यांनी कर्मचारी, अधिकाऱ्यांची नेमणूक केली आणि त्या आधारे घरोघरी सर्व्हे सुरू झाला.

हे काम दोन आठवड्यांत पूर्ण करण्यात आला. आता सर्वेक्षणाचे काम १०० टक्के पूर्ण करण्यात आले, असे महापालिका प्रशासनाकडून सांगण्यात आले. यात एकूण सहा लाख ८१ हजार कुटुंबीयांचा समावेश आहे. महापालिका क्षेत्राची लोकसंख्या जवळपास २५ लाखांच्या घरात आहे.

शहरी आणि ग्रामीण भाग मोडतो. त्यामुळे सर्व्हेसाठी नियोजन प्रशासनाने केले होते आणि एकूण एक हजार ३३८९ प्रगणक नेमण्यात आले होते. प्रगणकांनी घरी जाऊन कुटुंबीयांची भेट घेतली. मराठा, खुला प्रवर्ग; तसेच आरक्षित प्रवर्ग असा सर्व्हे करत माहिती अचूक भरण्याचा प्रयत्न करण्यात आला.