Solapur News : उजनीचा डावा कालवा (Canal) पाटकुलजवळ (ता. मोहोळ) फुटल्यानंतर तातडीने धरणातील पाणी बंद करावे लागले होते. आता त्या कालव्याची दुरुस्ती यांत्रिकी विभागाकडून युद्धपातळीवर सुरू आहे.

क्वालिटी कंट्रोल विभागाचे अधिकारी त्या ठिकाणी ठाण मांडून आहेत. २२ फेब्रुवारीनंतर पुन्हा त्या कालव्यातून शेतीसाठी पाणी सोडले जाणार आहे.

सोलापूर, नगर व पुणे (Solapur, pune, Nagar District) जिल्ह्यांसाठी वरदान असलेल्या उजनी धरणामुळे उसाचे क्षेत्र वाढले आणि साखर कारखान्यांची संख्या सर्वाधिक झाली. मुख्यत्वे डावा व उजवा कालव्यातून शेतीसाठी उजनीचे पाणी सोडले जाते.

सीना-माढा उपसा सिंचन योजना दहिगाव उपसा सिंचन योजना, कॅनॉल अशा पद्धतीने शेतीला उजनीतून पाणीपुरवठा होतो. भीमा नदीतून सोलापूर शहरासाठी वर्षातून किमान दोन-तीन वेळा पाणी सोडले जाते.

जिल्ह्यातील जवळपास दोन लाख हेक्टर क्षेत्राला उजनी धरणातून पाणी मिळते. आणखी काही योजना पूर्ण झाल्यानंतर सिंचनाखालील क्षेत्र वाढणार आहे. दरम्यान, पावसाळ्यानंतर शेतीसाठी उजनीतून पहिले आवर्तन सोडले आणि पाण्याच्या दाबामुळे कमकुवत झालेला डावा कालवा पाटकूलजवळ अचानक फुटला.

त्यामुळे शेतकऱ्याच्या शेतात पाणी शिरले आणि शेतीचे मोठे नुकसान झाले. झालेल्या नुकसानीच्या पंचनाम्याचे आदेश देत दुसरीकडे पाटबंधारे विभागाने कालव्याची दुरुस्तीदेखील तातडीने हाती घेतली.

त्या कालव्यातून कुरुल, बेगमपूर, कारंबा व मोहोळ शाखेअंतर्गत येणाऱ्या शेतकऱ्यांना पाणी मिळते. पाणी बंद झाल्याने त्या शेतकऱ्यांची पंचाईत झाली, पण आता पाच-सात दिवसांत काम पूर्ण होणार असून, त्यानंतर तातडीने उजनीतून पाणी सोडले जाणार आहे. मुरुम, माती टाकून त्यावर रोलिंग केले जात आहे.

नुकसानग्रस्तांना लवकरच मदत

फुटलेल्या या कालव्याचे सहा-सात दिवसांत काम पूर्ण होणार असून, झालेल्या नुकसानीचे पंचनामेही पूर्ण झाले असून, कृषी व महसूल विभागाचा अहवाल आल्यानंतर बाधित शेतकऱ्यांना भरपाई मिळेल, त्याचेही काम सुरू आहे, असे लाभक्षेत्र प्राधिकरणाकडून सांगण्यात आले.