Satara News : वंचित घटकांना मुख्य प्रवाहात आणत मायक्रो फायनान्सच्या विळख्यातील गरजू कुटुंबांना महाराष्ट्र राज्य ग्रामीण जीवनोन्नती अभियानाने बचत गटातून आधार दिला आहे. गत पाच वर्षांत उमेद परिवारातील दोन लाखांपेक्षा जास्त कुटुंबांना ७०८ कोटींचे कर्ज अत्यल्प व्याजदरात उपलब्ध करून दिले. यंदा ‘उमेद’मार्फत १८३ कोटी बँक कर्ज वितरण करण्याचे उद्दिष्ट ठेवले होते. यापैकी १५४ कोटी इतके कर्ज वितरण झाले आहे.

विकसित भारत संकल्प यात्रेदरम्यान जिल्ह्यातील बचत गटांना वेगवेगळ्या निधीबरोबरच राष्ट्रीय बँकांच्या माध्यमातून अत्यल्प व्याजदराचे अर्थसाहाय्य वितरित केले आहे. जिल्ह्यामध्ये विविध मायक्रो फायनान्स कंपन्या २४ ते ३६ टक्के व्याजाने कर्जवाटप करत आहेत.

याला पायबंद घालण्यासाठी फायनान्स कंपन्यांच्या विळख्यातील वंचित घटकांना उमेद अभियानाने बचत गटाच्या माध्यमातून संघटित केले आहे. त्यांची सावकारी कर्ज भागवण्याबरोबर खावटी गरज पूर्ण करण्यासाठी सात टक्के इतक्या अल्पदरात राष्ट्रीय बँकेच्या माध्यमातून बचत गटांना प्रतिगट दीड ते तीन लाख रुपयांपर्यंत कर्जपुरवठा केला आहे.

दोन लाख महिलांचे संघटन

महाराष्ट्र राज्य ग्रामीण जीवनोन्नती अभियानाअंतर्गत जिल्ह्यात २०१९ पासून अभियानाची अंमलबजावणी सुरू आहे. आजअखेर अभियानाअंतर्गत जिल्ह्यामध्ये २२ हजार ७७६ स्वयंसाहाय्यता समूहामध्ये दोन लाखांपेक्षा अधिक महिलांचे संघटन झाले आहे.

ग्रामस्तरावर एक हजार १६८ ग्रामसंघ व प्रभागस्तरावर ६१ प्रभागसंघ स्थापना केले आहेत. अभियानाअंतर्गत स्थापित स्वयंसाहाय्यता समूहातील विविध सदस्य शेती आधारित उद्योग व्यवसाय व बिगरशेती उद्योग व्यवसाय करून विविध उत्पादने बनवीत आहेत.