Akola News : अकोला व वाशीम जिल्ह्यांतील अवसायनातील सुमारे ६०६ सहकारी संस्थांची नोंदणी रद्द करण्यात येणार आहे. याबाबत २३ ऑक्टोबरपूर्वी सहायक निबंधक सहकारी संस्था (पदुम) यांच्याकडे आक्षेप दाखल करण्याचे आवाहन करण्यात आले आहे.

अकोला जिल्ह्यात २८३ दूध उत्पादक सहकारी संस्था, १६ कुक्कुटपालन सहकारी संस्था व १६ शेळी-मेंढीपालन सहकारी संस्था अशा एकूण ३१५ सहकारी संस्था अवसायनात आहेत.

वाशीम जिल्ह्यात २१५ दूध उत्पादक सहकारी संस्था, १४ कुक्कुटपालन सहकारी संस्था व ६२ शेळी-मेंढीपालन सहकारी संस्था अशा एकूण २९१ सहकारी संस्था अवसायनात आहेत. या संस्थांचे कामकाज बंद असणे, उद्देशानुसार कामकाज नसणे या कारणांमुळे अवसायनात काढण्यात आल्या. त्यात २३८ संस्थांना अवसायनात होऊन सहा वर्षांहून अधिक कालावधी झाला.

संस्थांच्या मालमत्तेचे, दप्तराचे, संस्थेचे देणे-घेणे आदींबाबतीत कार्यवाही करण्यासाठी अवसायकांना संस्थेचे दप्तर प्राप्त न होणे, नोंदणी पत्त्यावर कार्यस्थळी संस्थेचा ठावठिकाणा न मिळणे, संस्थेचे तत्कालीन अध्यक्ष, समिती सदस्य, व्यवस्थापक यांचा ठावठिकाणा न मिळणे आदी बाबी निदर्शनास आल्या आहेत.

त्यामुळे या संस्थांच्या नोंदणी रद्द करण्याची कार्यवाही सुरू करण्यात येणार आहे. संबंधितांनी आपले म्हणणे लेखी स्वरूपात सहायक निबंधक सहकारी संस्था (पदुम) अकोला यांच्या कार्यालयात दाखल करावे. अन्यथा संस्थांची नोंदणी रद्द करण्याची कारवाई करण्यात येईल, असा इशारा सहायक निबंधकांनी दिला आहे.

बुलडाण्यातील ५४४ ‘पदुम’ संस्थांवर गंडांतर

बुलडाणा : जिल्हा दुग्ध व्यवसाय विकास अधिकारी कार्यालयाच्या वतीने मागील सहा वर्षांवरील अवसायनातील पदुम संस्थांची नोंदणी रद्द करण्याची मोहीम सुरू करण्यात आली आहे. यात जिल्ह्यातील ५४४ संस्थांची नोंदणी रद्द करण्यात येणार आहे, अशी माहिती संबंधित विभागाच्या सूत्रांकडून मिळाली.

जिल्ह्यातील अवसायनात असलेल्या पदुम सहकारी संस्थांत बुलडाणा तालुक्यात ४५, चिखली ४४, मोताळा ६७, शेगाव २३, नांदुरा ३५, खामगाव ४५, जळगाव जामोद २२, संग्रामपूर १९ व पशूसंस्था १७, कुक्कुटपालन ६, मत्स्य संस्था १४ अशा एकूण ५४४ संस्थांचा समावेश आहे. ही यादी buldhana.nic.in या संकेतस्थळावर उपलब्ध आहे.