Raigad News : मे महिन्यात आतापर्यंतचा सर्वाधिक मुसळधार पाऊस पडला असला तरी रायगड जिल्ह्यातील टंचाईग्रस्त गावांतील नागरिकांना पिण्यासाठी विकतचे पाणी घ्यावे लागत आहे. जिल्हा परिषदेच्या पाणीपुरवठा विभागाच्या अहवालानुसार, चार दिवसांपूर्वी शनिवारी (ता. २४) ४३ गावे आणि २४२ वाड्यांमधील एकूण एक लाख १३ हजार नागरिकांना पाणीटंचाई जाणवत होती.

यासाठी प्रशासनाकडून ४२ टॅंकरद्वारे पाणीपुरवठा केला जात होता; मात्र मुसळधार पावसात सर्व टॅंकर बंद करण्यात आले आहेत. पाणी वाहून गेल्‍याने नैसर्गिक पाणवठे पाऊस थांबताच कोरडे पडतात. तर ज्या पाणवठ्यांमध्ये पाणी आहे, ते पिण्यायोग्‍य नसल्‍याने ६० टक्के टंचाईग्रस्‍त गावे अद्याप तहानलेली आहेत. त्‍यामुळे पिण्यासाठी जारद्वारे विकतचे पाणी घेण्याशिवाय त्‍यांच्याकडे पर्याय नाही.

दरवर्षी पावसाला सुरू झाल्‍यावरही टंचाईग्रस्त गावांमध्ये टॅंकरने पाणीपुरवठा केला जातो. यंदा मे महिन्यात झालेल्‍या पावसाने नागरिकांना काहीसा दिलासा दिला; मात्र हे पाणी वाहून गेल्‍याने टंचाईग्रस्‍त गावांना पुन्हा टंचाईच्या झळा बसू लागल्‍या आहेत. पाऊस सुरू होताच जिल्हा परिषदेने टँकर बंद करण्याचा निर्णय घेतल्‍याने नागरिकांना पदरमोड करून जारमधील पाणी विकत घ्यावे लागत आहे.

पेणमधील शिर्कीचाळ, दादर, रावे गावांत, अलिबागमधील मिळकतखार, सारळ या समुद्रकिनाऱ्यालगतच्या गावांची टंचाई कायम आहे. सर्वाधिक पाणीटंचाई महाड तालुक्यात आहे. मेमध्ये येथील बहुतांश पाणवठे आटले असून जलजीवनच्या योजनाही कुचकामी ठरल्या आहेत. शनिवारपर्यंत महाड तालुक्यात ११ गावे आणि ११६ वाड्यांना तर पनवेलमध्ये चार गावे आणि १४ वाड्यांत टंचाई होती.

पाच तालुक्यांमधील टंचाई नियंत्रणात

जिल्ह्यातील पाच तालुक्यांमध्ये पाणीटंचाई नियंत्रणात आहे. सुधागड, पाली, रोहा, म्हसळा, मुरूड, तळा या तालुक्यांमध्ये आजघडीला एकही गाव, वाडी टंचाईग्रस्त नाही, असा अहवाल जिल्हा परिषदेच्या पाणीपुरवठा विभागाने दिलेला आहे. तर यापूर्वी टॅंकरमुक्त तालुका म्हणून उल्लेख केला जात असलेल्‍या अलिबाग तालुक्यातही दोन टॅंकरने पाणीपुरवठा करावा लागला आहे.