Onion Rate News : कांद्यावरील निर्यातबंदी केंद्र शासनाने मागे घेतल्याने चांगला भाव मिळेल या आशेने आळेफाटा येथील उपबाजारात मंगळवारी (ता. ७) कांद्याच्या ३२ हजार ८२१ पिशव्यांची हंगामातील विक्रमी आवक झाली. कांदा मार्केटमध्ये जागा नसल्यामुळे मार्केटच्या बाहेर हजारो पिशव्या टाकण्यात आल्या होत्या.

एक नंबर गोळा कांद्यास दहा किलोला २०० रुपये बाजारभाव मिळाला आहे, अशी माहिती कृषी उत्पन्न बाजार समितीचे सचिव रुपेश कवडे यांनी दिली. जुन्नर कृषी उत्पन्न बाजार समितीच्या आळेफाटा या ठिकाणी झालेल्या मोठा एक नंबर कांद्यास १० किलोस १८० ते २००, दोन नंबर १६० ते १८०, तीन नंबर गोल्टी कांद्यास १२० ते १५०, चार नंबर बदला, चिंगळी कांद्यास १० किलोस ५० ते १२० रुपये बाजारभाव मिळाला.

दरम्यान, येथील बाजार समीतीत या आठवड्यात कांद्याची मोठी आवक झालेली असताना देखील बाजारभावात किलोला ५ ते ६ रुपये बाजारभावात वाढ झाली आहे, अशी माहिती संतोष कुऱ्हाडे यांनी दिली.