Solapur News : गाईच्या दूध खरेदी दराबाबत ठोस निर्णय घेतला जात नाही. तसेच दुधाला सरकारनेच प्रतिलिटर ३४ रुपये दर देण्याचे जाहीर करूनही त्याची अंमलबजावणी केली जात नाही.

त्यामुळे रयत क्रांती संघटनेकडून पंढरपूर तालुक्यातील रांझणी व मुढेंवाढी येथे शुक्रवारी (ता. २४) शासनाच्या आदेशाची होळी करण्यात आली. रयत क्रांती संघटनेचे कार्याध्यक्ष दीपक भोसले यांच्या नेतृत्वाखाली हे आंदोलन करण्यात आले.

‘‘राज्य सरकारने जून महिन्यात गाईच्या दुधाला प्रतिलिटर ३४ रुपये दर दिला. त्यामुळे काहीसा दिलासा मिळाला. पण रिव्हर्सच्या नावाखाली हा दर पुन्हा खाली आला. पण खासगी दूध संघाकडून नियमानुसार दर देण्याऐवजी त्यातही लूट सुरु केली.

आता तर दूध दर २७ रुपयांवर आणला आहे. सरकारही या खासगी संघवाल्यांना पाठीशी घालत आहे. या निषेधार्थ आम्ही काहीही उपयोग नसणाऱ्या या आदेशाची होळी केली,’’ असे भोसले या वेळी म्हणाले. ‘‘यावर सरकारने विचार करावा, अन्यथा मुंबई व पुण्याकडे जाणारे दुधाचे टँकर अडवू,’’ असा इशाराही त्यांनी दिला.