Nashik News : स्पायका ग्रीन एनर्जी अँड ॲग्रो प्रा. लि. संचलित एस. जे. शुगर रावळगाव साखर कारखान्याच्या गळीत हंगामाची सांगता शेतकरी संघटनेचे नेते शेखर पवार यांच्या हस्ते गव्हाण व शेवटच्या ऊस भरलेल्या गाड्यांचे पूजन करून झाली. रावळगाव कारखान्यामुळे गाव व परिसरातील बेरोजगारांच्या हाताला काम मिळाले. रोजगार वाढल्याने अर्थकारण वाढले. कारखान्याने उसाला चांगला दर दिल्याची भावना श्री. पवार यांनी व्यक्त केली.

रावळगाव कारखाना अध्यक्ष बबनराव गायकवाड व त्यांच्या सहकाऱ्यांनी पुन्हा ताकदीने सुरू केल्यानंतर या भागाला ऊसशेतीत पुन्हा नवी दिशा मिळाली आहे. विविध अडचणींवर मात करत कारखान्याने गेल्या वषपिक्षा या वर्षी अधिक उसाचे गाळप केले.

ऊस लागवडीसाठी शेतकरी मेळावे घेतले जात आहेत. शेतकऱ्यांना उसाचे बेणे वाटप सुरू करण्यात आले आहे. शेतकऱ्यांनी एकूण क्षेत्रापैकी २५ टक्के क्षेत्रावर ऊस लागवड करावी, असे आवाहन केले.

हंगामासाठी सहकार्य करणाऱ्या ऊस उत्पादक शेतकरी, ऊस तोडणी वाहतूकदार ठेकेदार, शासकीय अधिकारी, कारखान्यातील कर्मचाऱ्यांचे व्यवस्थापनाने आभार मानले. ऊस वाहतूक करणाऱ्यांना व महिलांना शेखर पवार, कारखान्याचे अध्यक्ष बबनराव गायकवाड, उपाध्यक्ष नानासाहेब आंबेकर, संचालक कुंदन चव्हाण आदींच्या हस्ते शाल, श्रीफळ, साडी देऊन सन्मानित करण्यात आले. उन्मय चव्हाण यांनी सूत्रसंचालन केले. कुंदन चव्हाण यांनी आभार मानले. सरव्यवस्थापक बी. एन. पवार उपस्थित होते.

हंगामाची स्थिती

एकूण गाळप (टन) ११४७२४.०१२

एकूण साखर (क्विंटल) १०९९९५.००

एकूण रिकव्हरी ९.५४ टक्के