Nagar Rain Update : नगर जिल्ह्यातील धरणक्षेत्रात अजूनही जोरदार पावसाची प्रतीक्षा असली तरी अकोल्यातील पश्चिम भागात सुरू असलेल्या जोरदार पावसामुळे भंडारदरा धरणातील पाणीसाठ्यात वेगाने वाढ होत आहे.

सोमवार (ता. ३) सकाळपर्यंत धरणात ५४.७० टक्के पाणीसाठा झाला आहे. मुळा धरणात ३३.२५ टक्के, तर निळवंडे धरणात २२ टक्के पाणीसाठा आहे.

नगर जिल्ह्यात यंदा उशिराने पाऊस सुरू झाला. अजूनही अनेक भागात जोरदार पाऊस नाही. दोन दिवसांपासून पुन्हा पावसाने हात आखडता घेतल्याने सुरू झालेल्या पेरण्या पुन्हा थांबल्या आहेत. मात्र अकोले तालुक्याच्या पश्चिम भागातील रतनवाडी, घाटघर, पांजरे, वाकी, भंडारदरा यांसह रतनगड परिसरात जोरदार पाऊस सुरू आहे.

सोमवारी (ता. ३) सकाळ आठ वाजेपर्यंत घाटघरला १२७ मिलिमीटर, रतनवाडीला १२० मिलिमीटर, वाकीला ५९ मिलिमीटर, पांजरे येथे ११५ मिलिमीटर, भंडारदरा येथे ७७ मिलिमीटर व निळवंडे धरण परिसरात १६ मिलिमीटर पावसाची नोंद झाली आहे.

पाणलोटात जोरदार पाऊस पडत असल्याने धरणात जोरदार पाण्याची आवक सुरू आहे. आतापर्यंत भंडारदरा धरणात सव्वा टीएमसी पाणी आले आहे.

निळवंडेतही सव्वा टीएमसी पाणी आले आहे. मुळात अजून पाण्याची आवक सुरू झाली नसली तरी कोतुळजवळ मुळा नदीतून २४४१ क्युसेकने पाणी वाहत आहे. २६ टीएमसी क्षमतेच्या मुळा धरणात ३३.२५ टक्के पाणी आहे.

नगर जिल्ह्यातील अन्य धरणांत मात्र पाण्याची आवक झालेली नाही. मात्र गतवर्षी चांगल्या पावसामुळे यंदा गेल्यावर्षीपेक्षा जास्त पाणीसाठा आहे. सध्या धरणात आधीचाच समाधानकारक पाणीसाठा दिसत असला तरी असाच पाऊस लांबत राहिला तर पाण्याचा काटकसरीने वापर करावा लागणार आहे.

धरणातील पाणीसाठा (टक्के)

भंडारदरा ५४.७०, निळवंडे २१.९७, मुळा ३३.२५, आढळा ५०.६६, भोजापूर ११.३६, पिंपळगाव जोगा ०, येडगाव ३५.१०, वडज ७.८८, माणिकडोह ७.९६, डिंभे ६.३८, मांडओहळ १३.५६, घाटशीळ पारगाव ११.४४, विसापूर १५.२०