Today Rain Update : सांगली जिल्ह्यात गेल्या दोन दिवसांपासून ढगाळ वातावरण होते. मंगळवारी (ता. २७) सकाळपासून जिल्ह्यातील काही भागांत पावसाची रिमझिम झाली. दुपारनंतर ढगाळ वातावरण होते. पाऊस सुरू झाल्याने शेतकरी पेरणीची तयारी करू लागला आहे. शेतकरी अजूनही मोठ्या पावसाच्या प्रतीक्षेत आहेत.

जिल्ह्यात पावसाने दडी मारली होती. गेल्या दोन ते तीन दिवसांपासून वातावरणात बदल झाला आहे. कधी ढगाळ तर कधी ऊन असे वातावरण होत आहे. जिल्ह्यातील मिरज, पलूस, वाळवा या तालुक्यांसह अनेक ठिकाणी हलक्या पावसाने हजेरी लावली.

तर काही भागांत दुपारपर्यंत रिपरिप पाऊस झाला. जिल्ह्यात पाऊस सुरू झाल्याने शेतकऱ्यांना काही प्रमाणात दिलासा मिळाला आहे. खरीप हंगामातील पेरणी झालेल्या पिकांना नवसंजीवनी मिळाली असून, शेतकरी पेरणीसाठी नियोजन करू लागला आहे. मात्र अजूनही शेतकरी मोठ्या पावसाची प्रतीक्षा करत आहेत.

सिंधुदुर्गात पावसाचा जोर वाढल

सिंधुदुर्ग जिल्ह्यात पावसाचा जोर वाढला असून मंगळवार (ता. २७) पहाटेपासून पावसाच्या जोरदार सरी कोसळत आहेत. सोमवारी सकाळच्या सत्रात पाऊस होता मात्र दुपारनंतर कडक ऊन पडले होते.

जिल्ह्यात शनिवारी (ता. २४) मॉन्सूनचे जोरदार पुनरागमन झाले. त्यानंतर ३० जूनपर्यंत जिल्ह्यात जोरदार पावसाचा अंदाज हवामान विभागाने दिला होता. परंतु रविवारी (ता. २५) दुपारनंतर पावसाचा जोर कमी होण्यास सुरुवात झाली.

सोमवारी सकाळी काही भागात पावसाच्या सरी कोसळल्या परंतु दुपारनंतर कडक ऊन सर्व जिल्ह्यात होते. दरम्यान मंगळवार पहाटेपासून जिल्ह्यात पावसाच्या सरी कोसळण्यास सुरुवात झाली. दुपारी बारानंतर पावसाचा जोर अधिकच वाढला असून जोरदार पाऊस सध्या जिल्ह्यात पडत आहे. या पावसामुळे शेतीच्या कामांना गती आली आहे.