Ahilynagar News : अहिल्यानगर जिल्ह्यातील दुष्काळी पट्टा असलेल्या कर्जत, जामखेडसह श्रीगोंदा, नेवाशात रविवारी (ता. १०) रात्री पाऊस झाल्याने खरीप पिकांना काहीसा दिलासा मिळाला आहे. प्रशासनाकडील नोंदीनुसार कर्जमधील कोंभळी मंडलात अतिवृष्टीची नोंद झाली आहे.

अहिल्यानगर जिल्ह्यात काही ठिकाणचा अपवाद वगळला तर जवळपास सलग महिन्यापासून पावसाचा खंड पडला आहे. त्याचा गंभीर परिणाम खरिपाच्या पिकांवर झाला आहे. वाढ खुटंली आहे. खते देण्याला अडचणी येत आहेत.

दोन दिवसांपासून मात्र वातावरणात बदल झाला असून रविवारी (ता. १०) रात्री कर्जत, जामखेड, श्रीगोंदा, नेवासा तालुक्यांतील अनेक भागांत चांगला पाऊस झाला. या पावसाने खरिपाच्या पिकांना दिलासा मिळाला आहे.

तूर, कापसाला खते देण्यसारखी स्थिती झाली आहे. पाथर्डी, शेवगाव, व अन्य भागांतही पावसाचा शिडकावा झाला. अकोले तालुक्यात पावसाची उघडीपच आहे. पावसाच्या खंडामुळे धरणातील पाण्याची आवक थांबली, विसर्गही बंद आहे.

जिल्ह्यात मागील २४ तासांत नोंदलेला पाऊस (मिमी) ः

कापुरवाडी ः १६, मांडवगण ः १३, कोळगाव ः १८, कर्जत ः ५१, कोंभळी ः ७१, मिरजगाव ः ५५, माहीजळगाव ः २९, वालवड ः ५१, कोरेगाव ः ३६, अरणगाव ः ३८, कुकाणा ः १९, घोडेगाव ः १९, देडगाव ः १७.