Nashik News : केंद्र सरकारच्या कांदा निर्यात बंदीमुळे संकटात सापडलेल्या शेतकऱ्यांना धीर देण्यासाठी राष्ट्रवादी काँग्रेसचे अध्यक्ष खासदार शरद पवार यांच्यापाठोपाठ काँग्रेस नेते खासदार राहुल गांधी सरसावले आहेत.

भारत जोडो न्याय यात्रा अंतिम टप्प्यात नाशिक जिल्ह्यातून मार्गक्रमण करणार असल्याने या दौऱ्यात गांधी कांदा उत्पादकांशी संवाद साधतील. शेतकऱ्यांशी संवाद साधण्यासाठी कांदा प्रश्न ज्वलंत असलेल्या चांदवड तालुक्याची निवड अंतिम मानली जात आहे.

गांधी यांच्या उपस्थितीत रॅली व भव्य शेतकरी मेळावा घेण्याबाबत चाचपणी सुरू आहे. या पार्श्वभूमीवर यात्रेचे समन्वयक आशिष दुआ व सुशांत मिश्रा यांनी चांदवड तालुक्यात मंगळवारी (ता.२७) येऊन स्थळांची पाहणी केली. माजी आमदार शिरीषकुमार कोतवाल यांच्याबरोबर बैठक घेत चर्चा केली.

महाराष्ट्रात न्याय यात्रा दाखल झाल्यावर ती नाशिक जिल्ह्यातून जाईल. या वेळी गांधी यांची मालेगावमध्ये जाहीर सभा होईल. त्यानंतर चांदवड येथे शेतकरी मेळावा होण्याची शक्यता आहे.