Sindhudurg News : सिंधुदुर्ग जिल्ह्यात भातरोप पुनर्लागवड पूर्ण झाल्यानंतर आता शेतकऱ्यांनी नाचणी लागवडीला प्रारंभ केला आहे. जिल्ह्यात सुमारे ३ हजार हेक्टरवर नाचणी लागवड केली जाते.

जिल्ह्यात खरीप हंगामात भातपीक आणि नाचणी पिकाची लागवड अधिकतर केली जाते. यावर्षी भातरोप पुनर्लागवड अखंडपणे झाल्यामुळे ती वेळेत पूर्ण झाली. गेल्या आठवड्यात भातरोप पुनर्लागवड पूर्ण झाल्यानंतर आता शेतकऱ्यांनी नाचणी पीक लागवडीला प्रारंभ केला आहे.

जिल्ह्यातील वैभववाडी, कणकवली, कुडाळ, सावंतवाडी आणि दोडामार्ग, देवगड या तालुक्यांमध्ये नाचणी लागवड अधिक होते. या भागात पावसाने उघडीप दिल्यामुळे शेतकऱ्यांनी नाचणी रोप लागवडीचे काम हाती घेतले आहे.

कोकणात साधारणपणे टोकण पद्धतीने नाचणी रोप लागवड केली जाते. आतापर्यंत दहा टक्के लागवड पूर्ण झाली आहे. पावसाचे प्रमाण कमी राहिल्यास येत्या आठवड्यात रोप लागवड पूर्ण होण्याचा अंदाज आहे.

मधुमेहामुळे नाचणीचे प्रमाण वाढतेय

जिल्ह्यात सात आठ वर्षांपूर्वी नाचणी लागवडीखालील क्षेत्र घटू लागले होते. परंतु मधुमेहाच्या रुग्णांच्या आहारात नाचणीचा वापर करण्यात येत असल्यामुळे नाचणी लागवडीखालील क्षेत्र जिल्ह्यात पुन्हा वाढू लागले आहे. काही महिला बचत गट देखील समूह पद्धतीने नाचणी लागवड करू लागले आहेत. त्यामुळे नाचणी लागवडीखालील क्षेत्र वाढू लागले आहे.