Beed News : या वर्षी कमी झालेल्या पावसामुळे तालुका परिसरात रब्बीची पेरणी निम्यानेच घटली आहे. मागील वर्षी दोन हजार हेक्टरवर रब्बीची लागवड झाली होती. परंतु, यावर्षी फक्त एक हजार १८० हेक्टरवर ज्वारी आणि हरभरा या दोनच पिकांची पेरणी झाली आहे.

तालुक्यामध्ये यावर्षी खरीप हंगामाच्या सुरवातीपासूनच अत्यल्प पाऊस झाला तर खरीप हंगामातील सोयाबीन पिकाला अत्यल्प उतारा आला. शेतकऱ्यांना उत्पादन खर्च निघणेही अवघड झाले आहे. कपाशीची लागवड यावर्षी खरीप हंगामात मोठ्या प्रमाणावर झाली होती. पाण्याची उपलब्धता असलेल्या बागायती क्षेत्रावर कापूस चांगल्या प्रमाणावर फुटला आहे.

मात्र, जिरायती क्षेत्रावरील कापूस पहिल्या वेचणीतच संपणार आहे. परतीचा पाऊस देखिल पडला नसल्याने यावर्षी धरणामध्ये केवळ साडे अकरा टक्केच पाणीसाठा शिल्लक आहे. धरणातील पाणीसाठा शासनाने आरक्षीत केला आहे.

रब्बी हंगामामध्ये मागील वर्षी दोन हजार हेक्टरवर लागवड झाली होती. परंतु, यावर्षी असलेल्या अत्यल्प पावसामुळे यावर्षी एक हजार १८० हेक्टरवर शेतकऱ्यांनी रब्बीची पेरणी केली असून, यामध्ये ज्वारी आणि हरभरा या दोन पिकांचा समावेश आहे.

ऊस उपलब्धतेची समस्या

यावर्षी विंधन विहिरीला पाणीसाठा अत्यल्प आहे. शिवाय माजलगाव धरणात केवळ साडेअकरा टक्केच पाणीसाठा असल्याने शेतकऱ्यांनी नविन उसाची लागवड यावर्षी अत्यल्प प्रमाणात केली आहे. परिणामी, पुढील वर्षी साखर कारखानदारांसमोर ऊस उपलब्धतेची समस्या राहणार आहे.

धरणातून आवर्तने नाही

मागील चार ते पाच वर्षांपासून सतत धरण भरत असल्यामुळे रब्बी हंगामात चार आणि उन्हाळी हंगामात तीन असे सात आवर्तने शेतीसाठी धरणातून मिळत होते. परंतु, यावर्षी अत्यल्प झालेल्या पावसामुळे धरणात कमी पाणीसाठा आहे. त्यामुळे रब्बीला देखिल आवर्तने मिळणार नाही.