Buldana News : राज्यात कथित गोमांस बंदीच्या नावाखाली खाटीक व मुस्लिम समाजावर अन्याय होत असल्याच्या निषेधार्थ जिल्ह्यातील जनावरांच्या खरेदी व विक्रीवर बहिष्कार टाकून सर्व खाटीक समाजाने अनिश्चित काळासाठी जनावरे खरेदी व कोणत्याही जनावरांची कत्तल न करण्याच्या निर्णय घेतला आहे. यासंदर्भात उपविभागीय अधिकारी यांना निवेदन देण्यात आले.

दिलेल्या निवेदनात म्हटले आहे, की या बंद दरम्यान कोणत्याही जनावरांची खरेदी किंवा कत्तल केली जाणार नाही. शेतकरी, चामडा कामगार आणि हाड उद्योग कारागीर मुस्लिमसह मांस खाणारे इतर जाती-धर्माचे लोकांची उपजीविका त्यांच्यावर अवलंबून आहे. मात्र, खाटीक समुदायाला लक्ष केले जात आहे.

त्यामुळे जिल्ह्यात सर्वत्र जनावरे खरेदी व मांस व्यवसाय बंद ठेवण्याच्या निर्णय घेण्यात आला. काही गावगुंड आणि पोलिसाकडून जनावरे विकत घेणाऱ्या खाटीक समाजाच्या व्यापाऱ्यांवर होत असलेले अन्याय आणि छापे मारून त्यांची पैशाची लूट केली जाते.

त्यांच्यावर गुन्हे दाखल करून व्यापाऱ्यांना अमानुषपणे मारहाण केली जात असल्याचे निवेदनात म्हटले आहे. शासनाने तत्काळ याकडे लक्ष देण्याची मागणी निवेदनातून करण्यात आली.

निवेदन देताना मोहम्मद अफसर कुरेशी, अजिस कुरेशी, जब्बार कुरेशी, मोजिब हसन कुरैशी, अफसर चौधरी, फारूक कुरेशी, तोफिक कुरेशी, खालिक कुरेशी यांच्यासह अनेक खाटीक समाजातील नागरिक मोठ्या संख्येत उपस्थित होते.