Pune News : तृणधान्याचा वापर आहारात वाढावा यासाठी आणि तृणधान्याची बाजारपेठ विस्तारावी यासाठी महाराष्ट्र राज्य कृषी पणन मंडळाच्या वतीने गणेश कला क्रिडा रंगमंच येथे ८ ते १२ जानेवारी दरम्यान मिलेट (तृणधान्य) महोत्सवाचे आयोजन करण्यात आले आहे.

महोत्सवात तृणधान्याच्या विविध पाककृतींसह विविध पदार्थ चाखता आणि खरेदी करता येणार आहे. यामध्ये विशेषतः ज्वारीचे आइस्क्रीम हे आकर्षण असणार आहे. अशी माहिती पणन मंडळाचे कार्यकारी संचालक डॉ. संजय कदम यांनी सोमवारी (ता.६) पत्रकार परिषदेमध्ये दिली. या वेळी मंडळाचे सरव्यवस्थापक विनायक कोकरे उपस्थित होते.

डॉ. कदम म्हणाले, की संयुक्त राष्ट्रसंघाने २०२३ हे वर्ष आंतरराष्‍ट्रीय तृणधान्य वर्ष साजरे केले. यामुळे आंतरराष्ट्रीय पातळीवर तृणधान्याचे आहारातील महत्त्व आणि जनजागृती वाढली आहे. नागरिकांच्या आहारात तृणधान्याचा वापर वाढावा, या माध्यमातून तृणधान्याची मागणी, लागवड, उत्पादन वाढावे या हेतूने पणन मंडळाच्या वतीने दर वर्षी एकाच वेळी आणि एकाच ठिकाणी या महोत्सवाचे आयोजन करून ब्रॅण्ड विकसित केला जाणार आहे.

यासाठी गेल्या वर्षी महोत्सवाचे आयोजन करण्यात आले होते. यामध्ये २०० पेक्षा अधिक शेतकरी, प्रक्रियादार, शेतकरी कंपनी, स्टार्टअप सहभागी झाले होते. गेल्या वर्षी ३२ लाख रुपयांची उलाढाल झाली होती. यावर्षी ४० लाख रुपयांच्या उलाढालीचा अंदाज आहे.’’

राज्यात ८ विभागात होणार महोत्सव

राज्यात पुण्यासह, कोकण (वाशी), नाशिक, छत्रपती संभाजीनगर, अमरावती, नागपूर, लातूर आणि कोल्हापूर येथे महोत्सवाचे आयोजन केले जाणार आहे.

एक कोटी ३० लाखांची उलाढाल

गेल्यावर्षी ८ विभागांत घेण्यात आलेल्या महोत्सवात १ कोटी ३० लाखांची उलाढाल झाली होती. यावर्षी २ कोटींच्या उलाढालीचे उद्दिष्ट ठेवण्यात आले आहे.

गुरुवारी पणन मंत्र्यांच्या हस्ते उद्घाटन

महोत्सवाला बुधवारी (ता.८) प्रारंभ होत असला तरी, पणनमंत्री जयकुमार रावल यांच्या हस्ते गुरुवारी (ता.९) महोत्सवाचे उद्घाटन होणार असल्याचे डॉ. कदम यांनी सांगितले.