Pune News: ‘‘पुणे कृषी उत्पन्न बाजार समितीत अडतदारांना सन्मानाने वागविले जात नाही. उपमुख्यमंत्री तथा पालकमंत्री अजित पवार यांचे आदेश असल्याचे सांगून समितीचे संचालक मार्केट यार्डात बेकायदा व्यवसायांना अर्थपूर्ण कारणास्तव पाठबळ देत आहेत,’’ असा धक्कादायक आरोप अडते असोसिएशनच्या संचालकाच्या राजीनामा पत्रातून करण्यात आले आहेत.

श्री छत्रपती शिवाजी मार्केटयार्ड अडते असोसिएशनचे कांदा बटाटा लसूण विभागातून निवडून आलेले संचालक अविनाश मोरडे यांनी असोसिएशनच्या संचालक सदस्यपदाचा राजीनामा दिला आहे. आपल्या राजीनाम्यात त्यांनी असोसिएशनचे अध्यक्ष आणि बाजार समितीचे संचालक अनिरुद्ध भोसले यांच्यावर आरोप केले आहेत.

राजीनामा पत्रामध्ये श्री. मोरडे यांनी म्हटले आहे, की आम्ही सर्व अडत्यांनी बाजार आवारात शेतकरी हिताच्याच बाबींना प्राधान्याने न्याय मिळेल, यास्तव श्री. भोसले यांना विश्वासाने दुहेरी सत्तेचा राजदंड दिला.

प्रत्यक्षात प्रामाणिक अडत्यांना झालेल्या अतोनात त्रासामुळे तसेच अत्यंत बेजबाबदार निर्णयांमुळे मी अत्यंत व्यथित झालो आहे. व्यवसायवाढीऐवजी बाजार आवारात प्रत्यक्षात फक्त आणि फक्त शेतकरी हिताविरोधीच गोष्टी घडल्या. त्या अक्षम्य पापकर्मात मला डोळे उघडे ठेवून फक्त बघ्याची भूमिका घ्यावी लागली, याची मला खंत आहे आणि ती कायमस्वरूपी असेल.