Pune News : महाराष्ट्र लोकसेवा आयोगातर्फे (एमपीएससी) येत्या २५ ऑगस्टला घेण्यात येणारी पूर्वपरीक्षा पुढे ढकलण्यात यावी, तसेच या परीक्षेत कृषी विभागाच्या २५८ पदांचा समावेश करावा, या मागण्यांवरून ‘एमपीएससी’च्या विद्यार्थ्यांचे मंगळवारपासून आंदोलन सुरू आहे.

मात्र गुरुवारी (ता.२२) आयोगाने पूर्वपरीक्षा पुढे ढकलण्याचा निर्णय घेतला असला, तरी ‘कृषी’च्या पदांबाबत आंदोलन सुरूच ठेवण्याचा निर्णय काही विद्यार्थ्यांनी घेतला आहे.

पुण्यातील शास्त्री रोडवरील अहिल्या अभ्यासिकेसमोर मंगळवारी (ता. २०) रात्रीपासून ठिय्या आंदोलन केले. ते गुरुवारीही सुरू होते.

या आंदोलनाला माजी कृषिमंत्री शरद पवार यांनी ‘एक्स’(ट्विटर)वर मत व्यक्त करून पाठिंबा दिला होता. तसेच आमदार रोहित पवार, रूपाली पाटील ठोंबरे, आपचे मुकुंद कीर्दत यांनीही विद्यार्थ्यांची भेट देत आंदोलनाला पाठिंबा दिला आहे.