अॅग्रोवन वृत्तसेवा
Sugar DSTA : पुणे ः देशाच्या साखर उद्योगात पर्यायी साखर उत्पादनाला चालना देण्याचा प्रयत्न दि डेक्कन शुगर टेक्नॉलॉजिस्ट्‍स असोसिएशनकडून (डीएसटीए) चालू आहे. त्यासाठी पुढील महिन्यात राष्ट्रीय पातळीवर चर्चा घडवून आणली जात आहे.

साखर उद्योगाने केवळ पांढऱ्या साखर उत्पादनावर भर न देता गंधकमुक्त साखर, कच्ची साखर, औषधीनिर्मिती (फार्मा शुगर) क्षेत्रातील साखर उत्पादनासाठी पुढे यायला हवे, असे ‘डीएसटीए’ला वाटते. त्यासाठी येत्या एक जून रोजी पुण्यातील डीएसटीएच्या मुख्यालयात राष्ट्रीय पातळीवरील चर्चा घेतले जात आहे. राष्ट्रीय साखर संस्थेचे (एनएसआय) माजी संचालक प्रा. नरेंद्र मोहन अगरवाल, डीएसटीएचे अध्यक्ष एस. बी. भड व गुजरात राज्य सहकारी साखर कारखाने संघाचे व्यवस्थापकीय संचालक जितेंद्र ठक्कर या वेळी उपस्थित असतील.

या चर्चासत्रात डीएसटीएचे अध्यक्ष एस. एस. शिरगावकर, व्ही. एम. कुलकर्णी आपली मते मांडतील. गंधकमुक्त साखर निर्मिती, त्यातील संधी, आव्हाने आणि उपयुक्तता यावर एमआरएन ग्रुपचे एस. पंड्या, ए. पवार, नॅचरल शुगरचे यू. डी. दिवेकर, डिफटेक टेक्नॉलॉजिजचे संजय जैन, यू. एस. जैस्वाल, सुनील अवस्थी, संतोष कुमार, सुव्हिरॉन इक्विपमेंट्‍सचे चैतन्य जोशी, क्रेडो इम्पेक्सचे शंतनू कुलकर्णी यांच्याकडून मते मांडली जातील.