Amravati News : ‘नोबेल पल्स फूड ग्रोअर्स को-ऑपरेटीव्ह सोसायटी’ने हरभरा विपणनाच्या क्षेत्रात एक पाऊल पुढे टाकत थेट शेतकऱ्यांच्या दारावरच खरेदीचा अभिनव पॅटर्न राबविला आहे. त्यामुळे शेतकऱ्यांचा बराच भार हलका झाला आहे.

‘नाफेड’च्या केंद्रांवर शेतकऱ्यांना तासनतास आपला क्रमांक येईपर्यंत ताटकळत राहावे लागते. यातच त्यांचा वेळ, श्रम आणि पैसाही खर्ची होतो. ही बाब गांभीर्याने घेत ‘नोबेल पल्स फूड ग्रोअर्स को-ऑपरेटीव्ह सोसायटी’ने थेट शेतकऱ्यांच्या दारावर जात हरभरा खरेदीचा निर्णय घेतला आहे.

दर्यापूर तालुक्‍यात सात केंद्रांतून हरभऱ्याची खरेदी होत आहे. त्यात धामोडी येथील नोबेल सोसायटीचाही समावेश आहे.

रामागढ, नरदोडा, हिंगणी, शिवर, पिंपळद, वरुड, दर्यापूर या गावांमध्ये २३०० क्‍विंटल हरभऱ्याची खरेदी केला आहे. संस्थेचे संजय आसरे, संदीप लाजूरकर यांच्या माध्यमातून हा उपक्रम राबविला जात आहे.